अफगानिस्तानमा भूकम्पबाट मृत्यु हुनेको सङ्ख्या १४ सय नाघ्यो
-
बिशाल यादब
- today१७ भदौ २०८२
काठमाडौँ । पूर्वी अफगानिस्तानमा आएको विनाशकारी भूकम्पमा मृत्यु हुनेको सङ्ख्या १४ सय नाघेको छ । तालिबान सरकारका प्रवक्ता जबिहुल्लाह मुजाहिदले मंगलबार यो जानकारी दिएका हुन् । भूकम्पमा परेर अहिलेसम्म करिब तीन हजार जना घाइते भएको उनले बताए । भग्नावशेषमा फसेका मानिसहरूलाई बाहिर निकाल्ने काममा संलग्न राहत टोलीहरू खटिइरहेको पनि उनले बताए ।
आइतबार राति अबेर पूर्वी अफगानिस्तानमा ६ म्याग्निच्यूडको विनाशकारी भूकम्प आएको थियो । भूकम्प पहाडी क्षेत्रमा आएको थियो, जसका कारण धेरै गाउँका घरहरू पूर्ण रूपमा भत्किए र मानिसहरू घण्टौँसम्म भग्नावशेषमा पुरिएका थिए । घाइतेहरूलाई बाहिर निकालिने काम भइरहेकोले मृतकको सङ्ख्या बढ्न सक्ने अफगानिस्तानको राष्ट्रिय विपद् व्यवस्थापन प्राधिकरणका प्रवक्ता युसुफ हम्मदले एसोसिएटेड प्रेसलाई भनेका छन् ।
