विदेशी पर्यटकको निगरानी अब विद्युतीय प्रणालीमार्फत, असोज १ बाट तारे होटलहरूमा लागू
-
मेराज हास्मी
- today१७ भदौ २०८२
काठमाडौँ — नेपालमा ‘भिजिट भिसा’ लिएर आउने विदेशी नागरिकहरूको दर्ता र निगरानी अब विद्युतीय प्रणालीमार्फत गरिने भएको छ। अध्यागमन विभागले नयाँ ‘विदेशी नागरिक दर्ता तथा ट्र्याकिङ प्रणाली’ लागू गर्ने जानकारी दिंदै मंगलबार सार्वजनिक सूचना जारी गरेको हो।
विभागका महानिर्देशक रामचन्द्र तिवारीका अनुसार यस प्रणालीको उद्देश्य विदेशी नागरिकको बसाइलाई सुरक्षित, पारदर्शी र नियमनमा ल्याउनु हो। साथै, सूचनाको आदान–प्रदान सहज बनाउने, सम्भावित अपराध नियन्त्रण गर्ने र नेपालको पर्यटन प्रवर्द्धनमा सहयोग पुर्याउने लक्ष्य राखिएको छ।
कार्यान्वयन चरणबद्ध रूपमा:
-
पहिलो चरण: आगामी असोज १ गतेदेखि काठमाडौँ उपत्यकाभित्रका तारे होटलहरूमा यो प्रणाली अनिवार्य रूपमा लागू गरिनेछ।
-
दोस्रो चरण: मङ्सिर १ गतेदेखि यो प्रणाली देशभरका तारे होटलहरू, विमान कम्पनीहरू, टुर्स एण्ड ट्राभल कम्पनीहरू, तथा मनी एक्सचेन्ज व्यवसायहरूमा विस्तार गरिनेछ।
विभागले उक्त प्रणालीमा कसरी दर्ता गर्ने र प्रयोग गर्ने भन्ने जानकारीसहितको प्रयोगकर्ता पुस्तिका (म्यानुअल) आफ्नो वेबसाइटमा उपलब्ध गराएको छ। थप जानकारी आवश्यक परेमा सूचना प्रविधि शाखा वा विभागमा सिधा सम्पर्क गर्न सकिने उल्लेख गरिएको छ।
सबै सरोकारवालालाई आबद्ध हुन आग्रह
विभागले विदेशी नागरिकसँग प्रत्यक्ष सेवा दिने सार्वजनिक तथा निजी क्षेत्रका संस्थालाई अनिवार्य रूपमा प्रणालीमा आबद्ध हुन आग्रह गरेको छ। यसका लागि ७७ वटै जिल्लाका जिल्ला अनुगमन समितिलाई आवश्यक पत्राचार गरिसकेको छ।
लामो छलफलपछि कार्यान्वयन
होटल सङ्घ नेपाल (HAN) ले पनि नयाँ प्रणालीबारे विगत केही समयदेखि छलफल हुँदै आएको जानकारी दिएको छ। सङ्घले चाँडै आफ्नो आधिकारिक धारणा सार्वजनिक गर्ने बताएको छ।
