सिरहाको लहानमा एकै परिवारका आमा र छोरा मृत फेला, आत्महत्याको आशंका
-
मेराज हास्मी
- today१७ भदौ २०८२
सिरहाको लहान नगरपालिका–१ मटियर्वास्थित एक डेरामा एकै परिवारका आमाछोरा मृत अवस्थामा फेला परेका छन्, भने अर्का एक बालक अचेत अवस्थामा उद्धार गरिएको छ।
लहान–१२ भोटियाटोलका प्रवीण चौधरीकी श्रीमती २३ वर्षीया रञ्जिता चौधरी र पाँच वर्षीय छोरा एरोज चौधरी आज बिहान घरभित्र मृत फेला परेका हुन्। त्यस्तै, नौ महिनाका अर्का छोरा भने अचेत अवस्थामा भेटिएर हाल प्रादेशिक अस्पताल, लहानमा उपचाररत छन्।
इलाका प्रहरी कार्यालय लहानका प्रमुख तथा प्रहरी नायब उपरीक्षक (डीएसपी) कैलाश राईले दिएको जानकारीअनुसार प्रारम्भिक अनुसन्धानमा रञ्जिताले आफ्ना दुई सन्तानलाई विष खुवाएर आफूले आत्महत्या गरेको आशंका गरिएको छ। डीएसपी राईका अनुसार, “शवको अवस्था हेर्दा घटनाक्रम विष सेवनपछि झुन्डिएर आत्महत्या गरिएको जस्तो देखिन्छ। तर परीक्षणपछि मात्रै पुष्टि हुनेछ।”
घटनाको खुलासा तब भयो जब केही दिनदेखि घरमा कुनै चहलपहल नदेखिएपछि स्थानीयले खुल्ला झ्यालबाट हेर्दा रञ्जिता झुन्डिएको अवस्थामा देखे र प्रहरीलाई खबर गरे।
प्रहरीका अनुसार मृतक रञ्जिताका श्रीमान् प्रवीण चौधरी पछिल्ला तीनदेखि चार दिनदेखि उक्त डेरामा देखिएका छैनन् र उनी हालसम्म पनि सम्पर्कमा आएका छैनन्। उनी दैनिक मजदुरी गरी परिवार चलाउने गरेका थिए।
लहान–१२ का वडाध्यक्ष बद्रीनारायण चौधरीका अनुसार चौधरी परिवार विगत दुई वर्षदेखि लहान बजार क्षेत्रमा डेरा लिएर बस्दै आएको हो। शवहरू कुहिन थालेको अवस्थामा भेटिएकाले घटना केही दिनअघि नै घटेको अनुमान प्रहरीले गरेको छ।
हाल घटनाको थप अनुसन्धान भइरहेको छ।
