अर्घाखाँचीमा श्रीमतीको हत्या गरी भान्छामै गाडिएको घटना उजागर
-
बिशाल यादब
- today१७ भदौ २०८२
अर्घाखाँचीको छत्रदेव गाउँपालिका–४, पातलेपोखरामा एक युवकले आफ्नै श्रीमतीको हत्या गरी भान्छाकोठामै शव गाडेको घटना बाहिरिएको छ। जिल्ला प्रहरी कार्यालय अर्घाखाँचीका डीएसपी चक्र मल्लका अनुसार मृतक सुमित्राको हराएको सूचना पाएपछि प्रहरीले अनुसन्धान थालेको थियो।
खोजतलासकै क्रममा घरभित्रै अस्वाभाविक गन्ध आएपछि उत्खनन् गर्दा भान्छामा खाल्डो खनेर गाडिएको अवस्थामा शव भेटिएको हो। अनुसन्धानमा १२ भदौको राति करिब मध्यराततिर श्रीमान् किरण र सुमित्राबीच विवाद भएको र सोही क्रममा किरणले बाँसको लाठ्ठी र हंसियाले प्रहार गरेर हत्या गरेको खुलेको छ। हत्या पश्चात् उनले शवलाई कम्बलमा बेरेर भान्छामै गाडेका थिए।
१६ भदौको राति प्रहरीले शव उत्खनन् गरी जिल्ला अस्पतालमा पोष्टमार्टमका लागि पठाएको छ। घटनास्थलबाट प्रहरीले हत्या गर्न प्रयोग भएका हतियारसँगै शव गाड्न प्रयोग गरिएका औजारहरू पनि बरामद गरेको छ।
पक्राउ परेका किरणविरुद्ध कर्तव्य ज्यान मुद्दा दर्ता गरी थप अनुसन्धान अघि बढाइएको प्रहरीले जनाएको छ। मृतक र आरोपी दुवैको दोस्रो विवाह भएको र उनीहरू प्रेम सम्बन्धपछि सँगै बस्दै आएका थिए।
