नेपाल–भारत मैत्री संघद्वारा अन्तर–विद्यालय वक्तृत्वकला प्रतियोगिता सम्पन्न
-
बिराज यादव
- today४ भदौ २०८२
वीरगञ्ज, भदौ ४ । नेपाल–भारत मैत्री संघ (NIFA) को आयोजना र डिएभी आर.बी. केडिया स्कूलको आतिथ्यतामा अन्तर–विद्यालय वक्तृत्वकला प्रतियोगिता–२०२५ वीरगञ्जमा भव्यतापूर्वक सम्पन्न भएको छ। प्रतियोगिता नेपाल–भारत मैत्री संघ पर्साका अध्यक्ष रजत सचदेवाको अध्यक्षता तथा भारतको महावाणिज्य दूतावास, वीरगञ्जका प्रमुख देवी सहाय मीणाको प्रमुख आतिथ्यमा सम्पन्न भयो।
कार्यक्रममा नेपाल–भारत मैत्री संघका राष्ट्रिय अध्यक्ष शैलेन्द्र किशोर झा, संरक्षक राजकुमार सिन्धी, राष्ट्रिय कोषाध्यक्ष अरुण के. सिंह, मध्यप्रदेश अध्यक्ष लभ राजा सिंह, डिएभी स्कुलका प्रधानाध्यापक राकेश मिश्रलगायत विशिष्ट व्यक्तिहरूको उपस्थितिले कार्यक्रमलाई विशेष बनायो। निर्णायक मण्डलीमा लेखक प्रमोद पाण्डे, ग्लोबल बिजनेस कलेजका संस्थापक निर्देशक ओमप्रकाश श्रेष्ठ, शिक्षाविद् पल्लवी हर्लाललगायत ख्यातिप्राप्त व्यक्तिहरू समावेश थिए। वीरगञ्ज र रक्सौलका ८ विद्यालयका १६ जना विद्यार्थी वक्ताहरुले प्रतियोगितामा सहभागी भएर आफ्नो प्रेरणादायी, जोशपूर्ण र सशक्त प्रस्तुति दिए।
विद्यार्थीहरूको उत्कृष्ठ वक्तृत्वकला र आत्मविश्वासी प्रस्तुति मार्फत नेपाल–भारतबीचको मित्रता, सहकार्य र भाईचारा अझ प्रगाढ भएको अनुभूति गरिएको थियो। समारोहमा सहभागिता जनाएका सबै अतिथि, विद्यालयका शिक्षक–विद्यार्थी तथा सहभागी विद्यालयहरूलाई आयोजक संस्थाले धन्यवाद ज्ञापन गर्दै प्रतियोगिता विद्यार्थीहरूको नेतृत्व क्षमता, वक्तृत्वकला र आत्मविश्वास विकासमा एउटा ऐतिहासिक मञ्च साबित भएको जनाएको छ।
