सखुवाप्रसौनीमा भूमिहीनसँग आयोगको अन्तरक्रिया तथा प्रमाणिकरण कार्यक्रम सम्पन्न
-
बिरेन्द्र यादब
- today३ भदौ २०८२
वीरगञ्ज, ३ भदौ भूमि समस्या समाधान आयोग, पर्साले सखुवाप्रसौनी गाउँपालिका–१ मा भूमिहीन दलित, भूमिहीन सुकुम्बासी र अव्यवस्थित बसोबासीसँग अन्तरक्रिया तथा स्थलगत प्रमाणिकरण कार्यक्रम सम्पन्न गरेको छ। कार्यक्रमको उद्घाटन आयोग पर्साका अध्यक्ष तबरेज अहमदले गरेका थिए भने वडा अध्यक्ष बासुदेव महतो थारुको अध्यक्षतामा बैठक सञ्चालन भएको थियो। कार्यक्रममा स्थानीय सरोकारवाला, जनप्रतिनिधि र नागरिक समाजका प्रतिनिधिहरूको समेत सक्रिय उपस्थिति रहेको थियो।
अन्तरक्रियामा सहभागी सेवाग्राहीहरूले दैनन्दिन बसोबासदेखि कागजी प्रमाण संकलनसम्मका समस्या राखेका थिए। त्यसअनुरूप आयोग र स्थानीय सरकारका प्रतिनिधिहरूले सम्बन्धित कानुनी प्रक्रिया, कागजात मिलान र राजस्व व्यवस्थापनबारे विस्तृत जानकारी दिएका थिए। मुख्य छलफलका बुँदाहरू: – तीन पुस्ताको प्रमाण : वंशज सम्बन्ध पुष्टि गर्ने नागरिकता, जन्मदर्ता, विवाह दर्ता र घरपरिवारको विवरण कसरी मान्य गर्ने भन्नेबारे चरणबद्ध मार्गदर्शन। – वैदेशिक रोजगारीमा रहेका लाभग्राही : विदेशमा रहेका व्यक्तिका लागि परिवारमार्फत प्रत्यायोजन, समयसीमा भित्र दुरदराजबाट कागजात पेस गर्ने सुविधा र उपस्थित नभएकाको दर्ता सुरक्षित राख्ने व्यवस्था। – मानापाथी/अंशबन्डा : पारिवारिक हिस्साबन्डा, मानापाथी तथा जग्गासम्बन्धी अधिकार–कर्तव्यको सार्वजनिक स्पष्टता। – राजस्व बराबरी : अव्यवस्थित बसोबासीले बुझाउनुपर्ने राजस्व र शुल्क कुन अवस्थामा, कसरी र कहाँ बुझाउने भन्नेबारे विस्तृत सूचीकरण। कार्यक्रमपछि आयोगको प्राविधिक टोलीले स्थलगत तथ्य संकलन, कागजातको प्रतिलिपि संकलन र प्राथमिक सूची अद्यावधिक गर्ने काम थालेको छ। साथै, सेवाग्राहीलाई आफ्नो विवरण एक–दुई हप्ताभित्र सम्बन्धित वडा कार्यालय वा आयोगको सम्पर्क बिन्दुमा आवश्यक कागजात बुझाउन अनुरोध गरिएको छ।
आयोजकले दीर्घकालीन बसोबासका प्रमाण, सामाजिक सूचक र आधारभूत सेवामा पहुँचसम्बन्धी सूचनालाई समेत अभिलेखीकरण गर्ने तयारी भएको जनाएको छ। कार्यक्रम अन्त्यमा आयोगले आवश्यक कानुनी तथा प्राविधिक सहयोग निरन्तर गर्ने प्रतिवद्धता जनाउँदै सहभागी समुदायलाई धन्यवाद ज्ञापन गरेको थियो।
