सर्लाहीमा गोली हानी शिक्षकको हत्या
-
मेराज हास्मी
- today३० श्रावण २०८२
लालबन्दी : सर्लाहीमा गोली हानेर एक शिक्षकको हत्या गरिएको छ। हरिपुर्वा नगरपालिकामा शिक्षकमाथि गोली प्रहार भएको प्रहरीले जनाएको छ।
गोली प्रहारबाट नगरपालिका वडा नम्बर-५ निवासी अन्दाजी ४० वर्षीय रामपुकार रायको मृत्यु भएको हो । मृतक शिक्षक निजी विद्यालयका शिक्षक रहेको खुलेको छ। उनको टाउकोमा गोली लागेको छ ।
घटनाको खबर प्राप्त हुनासाथ प्रहरी चौकी हरिपुर्वाबाट प्रहरी सहायक निरीक्षकको कमाण्डमा ४ जना, इलाका प्रहरी कार्यालय केशरगंजबाट प्रहरी निरीक्षक उमाकान्त जोशीको कमाण्डमा ११ जनाको टोली घटनास्थलमा खटिएको थियो ।
थप अनुसन्धान तथा आक्रमणकारीको खोजीका लागि जिल्ला प्रहरी कार्यालय सर्लाहीबाट प्रहरी उपरीक्षक योगेन्द्र कुमार खड्काको कमाण्डमा २१ जनासहित जम्मा ३६ जनाको प्रहरी टोली परिचालन गरिएको छ ।
उपचारका क्रममा जानकी हेल्थ केयरमा राति ८:४० बजे चिकित्सकले यादवलाई मृत घोषणा गरेका थिए । उनको शव सोही अस्पतालमा राखिएको छ । प्रहरीले घटनाबारे थप अनुसन्धान भइरहेको र गोली प्रहारमा संलग्न व्यक्तिहरूको खोजी कार्य तीव्र पारिएको जनाएको छ ।
अहिलेसम्म घटनाको कारण र आक्रमणकारीको पहिचान खुल्न नसकेको जिल्ला प्रहरी कार्यालय सर्लाहीले जनाएको छ। मृतक निजी विद्यालयका शिक्षक रहेको खुलेको छ ।
घटनाबारे विस्तृत विवरण आउन बाकी रहेको सर्लाही प्रहरी प्रवक्ता सरोज राइले बताए ।
श्रोत :- सर्लाही न्युज
