भ्रष्टाचार विरुद्ध YCL नेपालको डङ्गुरो! जिल्ला प्रशासन कार्यालय बारामा विकराल बनेको भ्रष्टाचार नियन्त्रणको माग
-
संजय कुशवाहा
- today१६ श्रावण २०८२
वीरगञ्ज, १६ साउन — "भ्रष्टाचार विरुद्ध हाम्रो अभियान!" भन्ने नारासहित YCL नेपाल बाराले जिल्ला प्रशासन कार्यालय बारामा फैलिँदै गएको विकराल भ्रष्टाचारको विरुद्ध कडा आवाज उठाएको छ। संगठनले भ्रष्टाचार नियन्त्रण तथा गम्भीर अनुगमनको लागि तत्काल हस्तक्षेप गर्न सम्बन्धित निकायहरूमाथि सार्वजनिक रुपमा आग्रह गरेको छ। YCL नेपालका अनुसार, बाराको जिल्ला प्रशासन कार्यालयमा सार्वजनिक सेवा, सिफारिस, प्रमाणपत्र वितरणदेखि प्रशासनिक निर्णय प्रक्रियासम्म अनेकौं अनियमितता र अवैध लेनदेन भइरहेको छ।
स्थानीय नागरिकहरू समेत प्रशासनको ढिलासुस्ती, दलाली प्रवृत्ति र सेवामा हुने घुसखोरीबाट हतास र आक्रोशित बनेका छन्। "यो भ्रष्टाचार अब सहन सकिने अवस्थामा छैन। यदि तुरुन्तै कारवाही भएन भने हामी सडकबाट आन्दोलन सुरु गर्छौं," YCL बाराका एक नेताले चेतावनी स्वरूप भने। तुरुन्तै छानबिनको माग YCL नेपालले सम्बन्धित मन्त्रालय, अख्तियार दुरुपयोग अनुसन्धान आयोग र गृहमन्त्रालयलाई तुरुन्तै विशेष टोली खटाई पारदर्शी छानबिन गर्न माग गरेको छ।
साथै, दोषी फेला परेमा कानूनी दायरामा ल्याएर सार्वजनिक रुपमा कारवाही गर्न पनि जोड दिएको छ। स्थानीय तह र प्रदेश सरकारको मौनता सवालमा संगठनले स्थानीय सरकार र प्रदेश सरकारको चुप्पीलाई गम्भीर प्रश्नको रूपमा उठाएको छ। "जब जनताको आवाज दबाइन्छ र भ्रष्टाचारीहरूलाई संरक्षण दिइन्छ, त्यो शासन होइन, अपराध हो," YCL का विज्ञप्तिमा भनिएको छ।
