सुख्खा संकटग्रस्त मधेशमा राहतमा जुट्न ऊर्जामन्त्री खड्काको निर्देशन
-
अनजित राउत कुर्मि
- today११ श्रावण २०८२
काठमाडौं, ११ साउन – मधेश प्रदेशलाई सरकारले सुख्खा संकटग्रस्त क्षेत्र घोषणा गरेसँगै ऊर्जा, जलस्रोत तथा सिंचाई मन्त्री दीपक खड्काले मन्त्रालय अन्तर्गतका सबै निकायलाई ढिलासुस्ती नगरी राहत कार्यमा सक्रिय हुन कडा निर्देशन दिएका छन्।
ऊर्जा मन्त्रालयमा आज बोलाइएको आपतकालीन उच्चस्तरीय बैठकमा मन्त्री खड्काले आठ जिल्लामा उत्पन्न सिंचाई र खानेपानीको संकट समाधानका लागि तुरुन्तै कदम चाल्न निर्देशन दिँदै भने, “अब कागजी प्रक्रिया र टेन्डरको झन्झटभन्दा माथि उठ्नुपर्छ, जुनसुकै कानुनी उपाय प्रयोग गरेर भए पनि जनतालाई राहत पुर्याउनुहोस्।”
बैठकमा जलस्रोत तथा सिंचाई मन्त्रालयका सचिवहरू सुरेश आचार्य र सरिता दवाडी, विद्युत प्राधिकरणका कार्यकारी निर्देशक हितेन्द्र देव शाक्य, सिंचाई विभागका महानिर्देशक संजिव बराल लगायत प्राविधिक तथा अधिकारीहरूको उपस्थिति थियो। मन्त्री खड्काले सबै इकाइहरूलाई निष्क्रिय नबस्न आग्रह गर्दै तत्काल डिप बोरिङ, सोलार पम्प, अस्थायी मोटर सेट र पाइपलाइन बिछ्याउने कार्य अघि बढाउन निर्देशन दिए।
त्यस्तै, कम पानीमै उत्पादन गर्न सकिने उन्नत जातका धानको बीउ तथा कृषि उपकरण किसानसम्म पुर्याउन पनि सम्बन्धित निकायलाई आदेश दिइएको छ। “राजधानीमा बसेर निर्देशनमात्र दिने बेला सकिएको छ, अब काम देखाउने बेला हो,” मन्त्री खड्काले भने।
बैठकमा सहभागी पदाधिकारीहरूले मन्त्रीको निर्देशनलाई तत्काल कार्यान्वयनमा लैजाने प्रतिबद्धता जनाएका छन्। साथै, मन्त्री खड्काले हरेक २४ घण्टामा प्रगति विवरण अनिवार्य रूपमा बुझाउने व्यवस्था मिलाउनसमेत निर्देशन दिएका छन्।
