‘बेस्ट पुलिस अफ द मन्थ’ घोषित: सई सुभाष यादवको वीरता र इमान्दारिताले प्रहरी संगठनको शिर उच्च
-
अमन गुप्ता
- today३० असार २०८२
सर्लाही, असार ३० – अपराध नियन्त्रण, सीमावर्ती सुरक्षाको मजबुत निगरानी, अवैध कारोबारमा कठोर नियन्त्रण, र मानव उद्धारका लागि अद्वितीय योगदान दिएका इलाका प्रहरी कार्यालय कर्मैयाका प्रमुख प्रहरी नायब निरीक्षक (सई) सुभाष यादव ‘बेस्ट पुलिस अफ द मन्थ’को सम्मानले विभूषित भएका छन्।
सर्लाही जिल्ला प्रहरी कार्यालयले असार महिनाको उत्कृष्ट कार्य सम्पादनको आधारमा यादवलाई यो सम्मान प्रदान गरेको हो। हरेक महिना कर्तव्यनिष्ठ प्रहरीलाई प्रोत्साहनस्वरूप दिइने यो पुरस्कार यसपटक यादवको नाममा सुम्पिएपछि जिल्लामा खुसी र गर्वको लहर चलेको छ। एकपछि अर्को सफलता: सई यादवले भारतको बिहार राज्यसँगको समन्वयमा नक्कली नेपाली रुपैयाँ रु १००० दरले १७६ थानसहित ५ जना र नलकटुवा पेस्तोलसहित २ जना भारतीय नागरिक पक्राउ गर्दै सीमावर्ती सुरक्षामा उल्लेखनीय योगदान दिएका छन्। त्यसैगरी, भारतको बसतपुरमा बन्धक बनाइएका १८ वर्षीय नेपाली युवा शेख जयसको ज्यान जोगाउँदै सकुशल उद्धार गर्नु, १० किलो गाँजासहित दुई जना, १६ किलो गाँजा बेच्दै गरेका एकजनाको पक्राउ, तथा ८२० केजी काजु भुसमा लुकाएर दुबई लैजाने ट्रक नियन्त्रणमा लिने कार्यहरूले यादवको सक्रियता स्पष्ट देखाउँछ। मानवता र समर्पणको परिचय: सई यादवले भारतबाट हालसम्म २९ जना बालबालिकाको उद्धार गरेका छन्। बाल अधिकार, लैङ्गिक हिंसा, घरेलु हिंसा र ठाडो उजुरीमा संवेदनशीलता र व्यावसायिकताको संगम प्रस्तुत गर्दै उनले प्रहरी संगठनको मान-मर्यादा उचाल्न सफल भएका छन्। असार महिनामा मात्र ४ जना बालबालिकाको तत्काल उद्धार गरिएको छ भने वर्षभरि १८२ जना फरार प्रतिवादी पक्राउ गरी अदालतमा उपस्थित गराइएको छ। पूर्व आईजीपीको सम्मान: गत वर्ष तत्कालीन प्रहरी महानिरीक्षक (आईजीपी) बसन्तबहादुर कुँवरबाट ‘उत्कृष्ट अनुसन्धानकर्ता’को उपाधि प्राप्त गरेका यादवको प्रहरी सेवा अब उदाहरणीय बनेको छ। जिल्ला प्रहरी प्रमुख योगेन्द्र खड्काले भन्नुभयो, “सई यादवको इमान, समर्पण र सुरक्षामा देखाएको प्रतिबद्धता अनुकरणीय छ। यिनले प्रहरीको पहिचान, राष्ट्रको सम्मान र जनताको भरोसा कायम राख्न ऐतिहासिक भूमिका निर्वाह गरेका छन्।” निष्कर्षमा: सई सुभाष यादवको यो सफलता केवल एक प्रहरी अधिकृतको होइन, राष्ट्रको गौरव हो। इमान्दारिता, निष्पक्षता र सामाजिक उत्तरदायित्वप्रति समर्पित प्रहरी सेवा नै आजको नेपाललाई सुरक्षित र समुन्नत बनाउने मार्ग हो — सई यादव त्यसका प्रेरणादायी अनुहार बनेका छन्।
