शनिबार साँझदेखि देशका विभिन्न क्षेत्रमा भारी वर्षा हुने, विभागको सतर्कता आग्रह
-
अनजित राउत कुर्मि
- today१३ असार २०८२
शनिबार साँझदेखि देशका विभिन्न क्षेत्रमा भारी वर्षा हुने, विभागको सतर्कता आग्रह काठमाडौँ, १४ असार – जल तथा मौसम विज्ञान विभागले शनिबार साँझदेखि देशका विभिन्न भागमा भारीदेखि अतिभारी वर्षा हुने भन्दै आवश्यक सतर्कता अपनाउन आग्रह गरेको छ। शुक्रबार साँझ सार्वजनिक गरिएको मनसुन विशेष बुलेटिनमा कर्णाली, सुदूरपश्चिम र लुम्बिनी प्रदेशका पहाडी तथा तराई क्षेत्रहरूमा विशेष प्रभाव पर्ने उल्लेख गरिएको छ। बङ्गालको खाडी र अरब सागरबाट प्रवाह हुने जलवाष्पयुक्त हावा र न्यूनचापीय प्रणालीको प्रभावका कारण वर्षा तीव्र हुने विभागको पूर्वानुमान छ। विभागले जनाएको छ कि हाल मनसुनको न्यूनचापीय रेखा पूर्वमा सरदर स्थानमा र पश्चिममा दक्षिणतर्फ सरेको अवस्थामा छ, जुन शनिबार साँझबाट उत्तरतर्फ सर्ने सम्भावना छ। कहाँ-कहाँ बढी प्रभाव? मनसुन प्रणालीको प्रभाव शनिबार साँझदेखि सोमबार बिहान (असार १६) सम्म सक्रिय रहनेछ। विशेषतः कर्णाली प्रदेशको पहाडी भूभाग, सुदूरपश्चिम र लुम्बिनी प्रदेशका पहाडी तथा तराई भूभागहरूमा अत्यधिक वर्षा हुन सक्ने अनुमान गरिएको छ। अन्य प्रदेशका पहाडी भागहरूमा पनि एक-दुई स्थानमा भारीदेखि अतिभारी वर्षाको सम्भावना रहेको छ। संभावित जोखिमहरू भारी वर्षाका कारण भू–क्षय, बाढी, पहिरो, गेग्रान बहाव, नदी-नाला तथा खोलाहरूमा पानीको सतह बढ्ने, डुबान, सडक अवरुद्ध, हवाई उडान प्रभावित हुने, कृषि र जनस्वास्थ्यमा असर पर्न सक्ने सम्भावनासमेत रहेको विभागले चेतावनी दिएको छ। दैनिक अद्यावधिक हेर्न सुझाव विभागले तीनदिने मौसम बुलेटिन निरन्तर अनुगमन गर्न र अद्यावधिक मौसमी सूचना नियमित रूपमा लिन सर्वसाधारण, स्थानीय प्रशासन तथा सरोकारवाला निकायहरूलाई अनुरोध गरेको छ। --- Downline: लुम्बिनी, कर्णाली र सुदूरपश्चिममा भारी वर्षाको उच्च सम्भावना, सतर्क रहन विभागको आग्रह
