वीरगञ्ज घटनामा संयमित बन्न मानव अधिकार प्रतिष्ठानको अपिल, शिक्षक आन्दोलन समाधानको पनि माग
-
संजय कुशवहा
- today३ बैशाख २०८२
काठमाडौं, ३ वैशाख/वीरगञ्जमा हालै भएको दोहोरो समुदायबीचको झडपप्रति राष्ट्रिय मानव अधिकार प्रतिष्ठान (HURFON) ले गम्भीर ध्यानाकर्षण जनाउँदै सबै पक्षलाई संयमता अपनाउन अपिल गरेको छ। चैत्र ३० गते वीरगञ्जको हनुमान जनोत्सव शोभायात्राका क्रममा उत्पन्न विवाद र त्यसपछि वैशाख २ गते भएको तनावमा सञ्चारकर्मी, सुरक्षाकर्मी, स्थानीयबासी र प्रदर्शनकारीहरू घाइते भएको विषयमा प्रतिष्ठानले चिन्ता व्यक्त गरेको छ।
विज्ञप्तिमा सञ्चारकर्मीहरूलाई लक्षित गरी आक्रमण गर्नु दु:खद भएको उल्लेख गर्दै सम्पूर्ण पक्षलाई शान्ति, संयमता र सहिष्णुताको बाटो अपनाउन आग्रह गरिएको छ। “समस्या समाधानको लागि वार्ताको माध्यमबाट अगाडि बढ्नुपर्छ,” विज्ञप्तिमा भनिएको छ, “शान्ति, सद्भाव कायम राख्न सम्पूर्ण समुदाय, नागरिक र राज्य जिम्मेवार बन्नुपर्छ।” यसका साथै प्रतिष्ठानले नेपाल शिक्षक महासंघको अगुवाइमा जारी आन्दोलनप्रति पनि ध्यानाकर्षण गराएको छ। शिक्षा ऐन जारी नगरेको भन्दै सरकारविरुद्ध आन्दोलनरत शिक्षक र कर्मचारीहरूले चैत २५ गतेदेखि काठमाडौं केन्द्रित आन्दोलनको घोषणा गरेका छन्।
प्रतिष्ठानले आन्दोलनका कारण शिक्षण प्रक्रिया अवरुद्ध हुनु र बालबालिकाको पठनपाठनमा असर पर्नु अत्यन्त दुर्भाग्यपूर्ण भएको बताएको छ। “विद्यालयमा तालाबन्दी गर्दै शिक्षण कार्य अवरुद्ध गर्नु समाधान होइन,” विज्ञप्तिमा भनिएको छ, “सरकार र आन्दोलनरत पक्षबीच वार्ताबाट समाधान खोजिनुपर्छ।”
अध्यक्ष भवानीप्रसाद खरेल र महासचिव घनश्याम तामाङद्वारा हस्ताक्षरित विज्ञप्तिमा मानव अधिकार, शिक्षाको पहुँच र सामाजिक शान्तिलाई सर्वोच्च प्राथमिकतामा राख्दै दुवै पक्षलाई संयमित र जिम्मेवार बन्न आह्वान गरिएको छ।
