बीरगञ्जमा ट्राफिक व्यवस्थापन कमजोर, असुलीधन्दा मौलाउँदै पर्सा ट्राफिक प्रमुख किन मौन
-
संजय कुशवाहा
- today९ चैत्र २०८१
बीरगञ्ज, वीरगञ्जमा ट्राफिक व्यवस्थापन कमजोर बन्दै गएको छ भने ट्राफिक प्रहरीको असुलीधन्दा बढ्दो क्रममा रहेको स्थानीयले गुनासो गरेका छन्। शहरका प्रमुख स्थानहरू – ड्राइपोड, प्रवानीपुर, गण्डक, बसपार्क र शंकराचार्य गेट लगायतका क्षेत्रमा चेकपोइन्ट राखी ट्राफिक प्रहरीले सवारी चालकहरूसँग अवैध असुली गर्ने गरेको गुनासो बढ्दै गएको छ।
बजार क्षेत्रका मुख्य सडकहरूमा अवैध पार्किङ हटाउने प्रयास अझै प्रभावकारी हुन सकेको छैन। जसका कारण मुख्य बजार क्षेत्रमा दिनभरि जाम लाग्ने गरेको छ। ट्राफिक व्यवस्थापन सुधार गर्ने नाममा प्रहरीहरूले चेकपोइन्टमा सवारी रोकी साना तथा ठूला गाडीका चालकहरूलाई मनपरी जरिवाना गर्ने, कागजात नबुझी रकम असुल्ने जस्ता गतिविधि खुलेआम भइरहेका छन्।
स्थानीय व्यवसायी र यातायात व्यवसायीहरूका अनुसार ट्राफिक प्रहरीले अनावश्यक रूपमा सवारी रोकेर कारबाहीको डर देखाई असुली गर्ने गरेको छ। "हामीलाई ट्राफिक नियम पालना गर्न गाह्रो छैन, तर जरिवानाको नाममा बेठिक असुली हुन थालेको छ," एक टेम्पो चालकले भने।
बीरगञ्ज महानगरपालिका र ट्राफिक प्रहरी कार्यालयले यस विषयमा तत्काल ध्यान दिनुपर्ने माग नागरिक तथा व्यवसायीहरूको रहेको छ। ट्राफिक व्यवस्थापनलाई प्रभावकारी बनाउँदै असुलीधन्दा रोक्न आवश्यक कदम चाल्नुपर्ने आवाज उठिरहेको छ।
