कुर्था च्यातिदिएको रिसमा छुरा हानेर आँशुको हत्या, नयाँ कुर्था किनिदिने भन्दा पनि छोडेनन्
-
बिराज यादव
- today४ चैत्र २०८१
काठमाडौं । दुई दिनअघि धनुषाको जनकपुरधाम उपमहानगरपालिका–१३ बिन्धीका १५ वर्षीय आँशु यादवको हत्या कुर्ता च्यातिएको विषयमा साथीले नै गरेको खुलेको छ । शनिबार होली खेल्ने क्रममा साँझ करिव ५ बजे स्थानीय लक्ष्मण महतोका छोरा २१ वर्षीय धर्मेन्द्र महतोले आँशुमाथि छुरा प्रहार गरेका थिए । घरमा भएका उनलाई साथीमार्फत बोलाएर छाती, ढाड र पेटमा छुरा प्रहार गरिएको थियो ।
गम्भीर घाइते भएका आशुको जनकपुर प्रादेशिक अस्पतालमा करिब ६ बजे मृत्यु भएको थियो । धर्मेन्द्र तत्कालै छुरासहित पक्राउ परे । धर्मेन्द्रले आशुमाथि छुरा प्रहार गर्दा काकी विनिता र छोरा रुपेशले रोक्न खोजेका थिए । त्यसक्रममा रुपेशलाई पनि दुई ठाउँमा छुरा लागेको खुलेको छ ।आँशुकी आमा अर्चनाका अनुसार होली खेल्ने क्रममा धर्मेन्द्रको कुर्था (टी–सर्ट) थोरै च्यातिएको थियो । सोही विषयमा धर्मेन्द्र रिसाएर आँशुलाई मार्ने धम्की दिए ।
अर्चनाले सम्झाई बुझाई गरी नयाँ कुर्ता किनिदिने बताएपछि उनी घर फर्किएका थिए । तर, केही समयपछि धर्मेन्द्रले आफ्ना साथीहरु लगाएर आँशुलाई बोलाउन पठाएको अर्चनाले बताइन् । आफुले रोक्दा रोक्दै आँशु, राजन र रुपेश घरबाट निस्किएको उनको भनाई छ । आँशु पुग्नासाथ धर्मेन्द्रले छुरा प्रहार गर्न थालेका थिए । आँशुलाई बचाउन गएकी काकी विनिताका अनुसार धर्मेन्द्रले आँशुमाथि छुरा प्रहार गर्दा उनी र छोरा रुपेशले रोक्न खोजे ।
त्यस क्रममा रुपेशलाई दुई ठाउँमा छुरा लागेको थियो । रुपेश भुईंमा ढलेको मौका पारी धर्मेन्द्रले तीनपटक आँशुलाई छुरा हानेको विनिताले बताइन् । गम्भीर अवस्थामा रुपेशले नै आँशुलाई मोटरसाइकलमा प्रादेशिक अस्पताल पु¥याएका थिए ।उपचारकै क्रममा उनको मृत्यु भएको थियो । उनी जनकपुरधामस्थित यज्ञबलक्य ज्ञानकुप माध्यमिक विद्यालयमा कक्षा ८ मा अध्ययनत थिए ।
