होली खेल्ने क्रममा विवाद हुँदा जितपुरमा हवाई फायर
-
बिशाल यादब
- today२ चैत्र २०८१
वीरगञ्ज । बाराको जितपुरमा हिजो एक राउण्ड हवाई फायर भएको छ । होलीको दिन हिजो जीतपुर सिमरा उपमहानगरपालिका वडा नम्बर ७ का परशुराम गिरीले इजाजत प्राप्त बन्दुकबाट एक राउण्ड हवाई फायर गरेको हो । गिरीको घरमा एक समूहले ढुंगामुढा सहित आक्रमण गरेपछि गिरीले हवाई फायर गरेको हो ।
जीतपुर सिमरा उपमहानगरपालिका वडा नम्बर ७ का विवादित वडा अध्यक्ष सुनिल गुप्ताको नेतृत्वमा रहेको समूहले पर्शुराम गिरीको घरमा गएर गालीगलौज गर्दै ढुंगामुढा गर्न थालेपछि गिरीले एक राउण्ड हवाई फायर गरेको गिरीले बताए । उनले वडा अध्यक्ष सुनिल गुप्ताले जानी जानी आफूमाथि आक्रमण गर्न लगाएको आरोप लगाउनु भएको छ ।
बारा प्रहरीका सूचना अधिकारी प्रहरी नायव उपरीक्षक विजयराज पण्डितले होली खेल्ने क्रममा विवाद हुँदा पर्शुराम गिरीले लाईसेन्स प्राप्त एकनाले बन्दुकबाट पर्शुराम हवाई फायर गरेको बताए । गिरी र गुप्ताबीच जीतपुर सिमराको गौशाला भत्काएको र शिवमन्दिर भत्काएको घटनादेखि विवाद कायम रहेको स्थानीयले बताएका छन् । वडा अध्यक्ष गुप्ता यसअघि पनि पटक पटक विवादमा आएका व्यक्ति हुन् ।
वडा अध्यक्ष गुप्ता कहिले जीतपुर सिमरा उपमहानगरपालिका कार्यालय अगाडि फोहोर फालेर सेवाग्राहीलाई नै सेवाबाट बञ्चित हुने गरी अवरोध गर्ने, कहिले पत्रकारलाई धम्की दिने र अभद्र व्यवहार गर्ने लगायतका गतिविधि गर्ने गरेका छन् । उनलाई बारा जिल्ला अदालतले जरिमाना समेत तिराएको छ । उनी नेकपा एमाले पार्टीबाट वडा नम्बर ७ मा निर्वाचित भएका हुन् ।
