पर्सागढीमा दोस्रो राष्ट्रपति रनिंग शिल्ड सम्पन्न, नेरामावि बर्वाछटैलीलाई लगातार उपाधि
-
मेराज हास्मी
- today२१ फाल्गुन २०८१
वीरगञ्ज । पर्साको पर्सागढी नगरपालिकामा दोस्रो राष्ट्रपति रनिंग शिल्ड प्रतियोगिता सफलतापूर्वक सम्पन्न भएको छ । प्रतियोगिता पर्सागढी नगरपालिका पकडिया बढ्निहारस्थित जनता माध्यमिक विद्यालयमा आयोजना गरिएको थियो ।
प्रतियोगितामा श्री नेपाल राष्ट्रिय माध्यमिक विद्यालय, बर्वा छटैलीले उत्कृष्ट प्रदर्शन गर्दै लगातार दोस्रो पटक उपाधि जित्न सफल भएको छ । उक्त विद्यालयले १४ स्वर्ण, ९ रजत र ८ कास्य पदक जितेको प्रतियोगिताका मुख्य निर्णायक बिश्वेश्वर पटेलले जानकारी दिए ।
यसैगरी, श्री नेपाल राष्ट्रिय माध्यमिक विद्यालय, बडेर्वाले ६ स्वर्ण, ६ रजत र २ कास्य पदक प्राप्त गर्दै दोस्रो स्थान हासिल गरेको छ भने पर्सा रेन्वो इंग्लिस बोर्डिंग स्कुल तेस्रो स्थानमा रह्यो। उसले ३ स्वर्ण, २ रजत र ७ कास्य पदक जित्न सफल भयो ।
पर्सागढी नगरपालिकाका नगर प्रमुख गोकर्ण पाठकले खेलकुद क्षेत्रको विकासका लागि पालिकाले प्राथमिकताका साथ काम गरिरहेको बताए । उनले पढाइसँगै खेलकुद पनि महत्वपूर्ण भएको हुँदा खेलाडीहरूको प्रोत्साहनका लागि नगरपालिकाले निरन्तर सहयोग गर्दै जाने बताए ।
मुख्य निर्णायक बिश्वेश्वर पटेलले विद्यालय तहका छात्र–छात्रालाई खेलकुदमा सहभागी गराउन अझ बढी प्रेरित गर्नुपर्नेमा जोड दिए । उनले पर्सागढी नगरपालिकामा रहेका खेलाडीहरूलाई वार्षिक रूपमा सम्मान गर्ने व्यवस्था मिलाउनुपर्ने तथा खेलकुद गतिविधिहरूलाई निरन्तरता दिनुपर्ने आवश्यकता औंल्याए ।
तीन दिनसम्म चलेको प्रतियोगितामा एथ्लेटिक्स, भलिबल र कबड्डीका विभिन्न खेलहरू सम्पन्न भएका थिए । प्रतियोगितामा १२ वटा विद्यालयका करिब ७०० विद्यार्थीले सहभागिता जनाएका थिए । प्रतियोगिताका विजेताहरूलाई शिल्ड, मेडल तथा प्रमाणपत्र प्रदान गरिएको थियो ।
कार्यक्रममा पर्सागढी नगरपालिका शिक्षा शाखाका प्रमुख कपिल लामिछाने, विभिन्न विद्यालयका प्रधानाध्यापकहरू, शिक्षक तथा खेलप्रेमीहरूको उपस्थिति रहेको थियो ।
यसअघि पर्साको ठोरी गाउँपालिका र जिराभवानी गाउँपालिकामा राष्ट्रपति रनिंग शिल्ड प्रतियोगिता सम्पन्न भइसकेको छ । तर, अन्य ११ वटा स्थानीय तहहरूले भने प्रतियोगिता सञ्चालनका लागि खासै चासो देखाएका छैनन् ।
