वीरगञ्ज गोल्डकप : चर्च ब्वाइजलाई २-१ हराउँदै मच्छिन्द्र फुटबल क्लब सेमिफाइनलमा प्रवेश
-
अशोक यादब
- today२१ फाल्गुन २०८१
वीरगञ्ज । भेट्रान्स सिटी क्लब वीरगञ्जले आयोजना गरेको मधेस प्रदेशकै सर्वाधिक पुरस्कार राशिको दोस्रो संस्करणको वीरगञ्ज गोल्डकप फुटबल प्रतियोगिताको चौथो खेलमा मच्छिन्द्र फुटबल क्लब विजयी भएको छ ।
मङ्गलवार वीरगञ्जस्थित आदर्शनगर रङ्गशालामा भएको खेलमा मच्छिन्द्र फुटबल क्लबले एपिआई चर्च ब्वाइज युनाइटेडलाई २-१ ले पराजित गर्दै सेमिफाइनलमा आफ्नो स्थान पक्का गरेको छ ।
खेलको पहिलो हाफमा दुवै टोलीले गोल गर्न नसके पनि ५४ औँ मिनेटमा मच्छिन्द्र फुटबल क्लबका कप्तान रेजीन सुब्बाले पहिलो गोल गरे ।
त्यसको केही समय भित्रै ७६ औ मिनेटमा एपिआई चर्च ब्वाइज युनाइटेडका कप्तान डिका सेर्गेले गोल फर्काए । खेलमा दुवै टिम जितको दाउमा रहे पनि खेलको निर्धारित समयमा थप अतिरिक्त पाँच मिनेट थपिएको थियो । त्यही समयलाई सदुपयोग गर्दै अन्तिम मिनेटमा मच्छिन्द्र फुटबल क्लबका कप्तान रेजीन सुब्बाले आफ्नो दोस्रो गोल गरेर टिमलाई जिताए ।
खेलमा उत्कृष्ट प्रदर्शन गर्ने सुब्बा प्लेयर अफ दि म्याच पनि घोषित भए । उनले नगद १० हजार सहित शिल्ड पनि पाएका छन् ।आजको जितसँगै मच्छिन्द्र फुटबल क्लब दोस्रो सेमिफाइनलमा नेपाली पुलिस क्लबसँग भिड्नेछ ।
प्रतियोगिताको उद्घाटन खेलमा आयोजक टोली वीरगञ्ज युनाइटेडले गरवाल डायमन्ड फुटबल क्लबमाथि १-० को जित हासिल गरेको थियो । त्यस्तै, आइतबारको दोस्रो खेलमा सलहेश फुटबल क्लबले सङ्कटा क्लबलाई टाई ब्रेकरमा ५-४ ले हराउँदै सेमिफाइनलमा स्थान बनायो । सोमबार भएको तेस्रो खेलमा विभागीय टोली समेत रहेको नेपाल पुलिस क्लबले बागमती युवा क्लबलाई २-० ले पराजित गरेको थियो ।
मङ्गलवार भएको चौथो खेल जितेसँगै मच्छिन्द्र फुटबल क्लब प्रतियोगिताको सेमिफाइनलमा पुग्ने चौथो र अन्तिम टिम बनेको छ । बुधवार पहिलो सेमिफाइनल खेलमा वीरगञ्ज युनाइटेड र नेपाल पुलिस क्लबबिच प्रतिस्पर्धा हुने छ ।
राष्ट्रिय स्तरका ८ टिम सहभागी प्रतियोगिताको विजेताले ११ लाख ११ हजार १११ रुपैयाँ नगदसहित ट्रफी, मेडल र प्रमाणपत्र पाउनेछ। उपविजेताले ५ लाख ५५ हजार ५५५ रुपैयाँ र उत्कृष्ट खेलाडीले विद्युतीय स्कुटर प्राप्त गर्नेछन् । वीरगञ्ज महानगरपालिकाको मुख्य प्रायोजनमा आयोजित यो प्रतियोगितामा सङ्कटा, मच्छिन्द्र, नेपाल पुलिस, एपीएफ चर्च ब्वाइज, सलहेश, बागमती युवा र वीरगञ्ज युनाइटेडजस्ता बलिया टिमले सहभागिता जनाएका छन् ।
आदर्शनगर रङ्गशालामा २ हजार दर्शक अट्ने अस्थायी बाँसको प्याराफिट र थप ३ हजारभन्दा बढी दर्शकका लागि व्यवस्था गरिएको छ ।
