ओली सरकारलाई फोहोर उठाउनेहरूको श्राप लाग्ला” - ज्ञानेन्द्र शाही
-
बिरेन्द्र यादब
- today१३ फाल्गुन २०८१
वीरगञ्ज । राष्ट्रिय प्रजातन्त्र पार्टी (राप्रपा) का सांसद ज्ञानबहादुर शाही (ज्ञानेन्द्र शाही) ले केपी ओली नेतृत्वको सरकारबाट जनताको कहिल्यै पनि भलो नभएको बताएका छन् । प्रतिनिधिसभाको आजको बैठकमा सांसद शाहीले गाउँ गाउँमा सिंह गयो तर दरबार गएन भन्दै यस्तो बताएका हुन् । उनले काठमाडौँ महानगरपालिकालगायत देशभरका स्थानी तहमा प्रमुख प्रशासकीय अधिकृत रोकेर राखिएको भन्दै आपत्ति जनाए ।
उनले भने, “देशभरका शिक्षक, स्वास्थ्यकर्मी तथा कर्मचारीहरू ठप्प छन् । काठमाडौँ महानगरपालिकामा आज सरसफाइ गर्ने कर्मचारीहरूले तलब खान पाइरहेका छैनन् । यो ओली सरकारलाई त्यसको पाप लाग्ला । आज मेरो जुम्लामा पनि त्यही हालत छ । ८५ हजार ५५८ कर्मचारी उनीहरूको चाकडी र घरदैलो गर्न नियुक्ति गरिएको हो र? यदि सरकारलाई त्यो कुरा लाग्छ भने अब आउने स्थानीय तहको चुनावमा नगराएर आफ्ना आसेपासे कार्यकर्तालाई टीका लगाएर अबीर जात्रा गरेर घोषणा गरिदिनुस् ।आज
देशभरका हालत बेहाल बनाइएको छ । यसको घोर भर्त्सना गर्छु। यदि सरकारले यस्तै गरिरहने हो भने स्थानी तहको चुनाव नगराए पनि हुन्छ ।” यस्तै उनले दुर्गमलाई सधैँ दुर्गम बनाइरहने र सुगमलाई सधैँ सुगम बनाइरहने यो वित्तीय समानीकरण अनुदान कटौती भएको बताउँदै सरकारले छिटो उपलब्ध गराउन माग समेत गरे । उनले भने, “सबै स्थानीय तह महानगरपालिका जस्ता हुँदैनन् । कतिपय स्थानीय तह कर्मचारीलाई तलब दिन सक्ने अवस्थामा छैनन् । काठमाडौँ महानगरपालिकालाई बन्धक नबनाइयोस् फोहोर उठाउनेहरूको श्राप लाग्ला यो ओली सरकारलाई ।”
