कार्यालय, नगद लगायत दस्तावेज शेष घलेलाई बुझाउन केसी पक्षलाई सर्वोच्चको निर्देशन
-
बिशाल यादब
- today११ फाल्गुन २०८१
सर्वोच्च अदालतले बद्री केसी पक्षलाई गैरआवासीय नेपाली संघ (एनआरएनए) को कार्यालय, नगद, जिन्सी तथा सम्पूर्ण दस्तावेज शेष घलेलाई बुझाउन निर्देशन दिएको छ।विवाद समाधान गरी एकताको महाधिवेशन गराउने जिम्मेवारी पाएको उच्चस्तरीय समितिलाई सम्पूर्ण कुरा बुझाउन सर्वोच्च अदालतले पत्राचार गर्दै बद्री केसी पक्षलाई निर्देशन दिएको हो।
उच्चस्तरीय समितिको संयोजक एनआरएनएका पूर्वअध्यक्ष शेष घले हुन्। हाल संघको बालुवाटारस्थित सचिवालयबाट बद्री केसी पक्षले काम गर्दै आएको छ।अदालतले यसअघि घलेलाई एकता महाधिवेशन गराउने जिम्मा दिए पनि उनी सम्मिलित उच्चस्तरीय समितिले सचिवालयमा प्रवेश पाएको थिएन।
'समितिले नयाँ समितिको निर्वाचन गर्ने प्रयोजनको लागि सम्पूर्ण कार्यालय, कर्मचारी प्रशासन, नगद तथा जिन्सी सामान, कागजात, दस्तावेजहरू लगायत सम्पूर्ण सामान हस्तान्तरण गरिदिन भनी यो निर्देशन दिइएको छ। प्रस्तुत निर्देशनको अवज्ञा गरेमा सम्मानित इजलासमा सर्वोच्च अदालतको आदेशको अवज्ञा गरेको र कार्यपालना समेत नगरेको भन्ने समेत व्यहोरा सहितको यस सर्वोच्च अदालत फैसला, कार्यान्वयन निर्देशनालयबाट प्रतिवेदन समेत पेश गरिने व्यहोरा जानकारीका लागि अवगत गराईन्छ,' निर्देशनमा भनिएको छ। निर्देशनको सात दिनभित्र परिपालन गरी सर्वोच्च अदालतको फैसला कार्यान्वयन निर्देशनालयलाई जानकारी गराउन पनि निर्देशन दिइएको छ।
