प्युठान दम्पती हत्या प्रकरण : आफ्नै भतिजबाट हत्या, समातिए आरोपी
-
संजय कुशवहा
- today११ फाल्गुन २०८१
काठमाडौं । प्युठानमा दम्पती हत्याको आरोपमा प्रहरीले एक जनालाई पक्राउ गरेको छ । पक्राउ पर्नेमा माण्डवी गाउँपालिका–२ रातापानीका ३४ वर्षीय पंकज परियार छन् । उनै पंकजले रातापानीकै ६० वर्षीय रामबहादुर परियार र उनकी श्रीमती हुकुमा परियारको हत्या गरेको पाइएको जिल्ला प्रहरी कार्यालय प्युठानका डीएसपी दिपेश बस्यालले बताए । हत्या आरोपमा पक्राउ परेका पंकज मृतक दम्पतीका दाइको छोरा रहेको डीएसपी बस्यालले बताए । रातापानीमा परियार दम्पती मृत अवस्थामा फेला परेको भन्दै प्रहरीलाई खबर आएको आएको थियो ।
छिमेकीले टेलिफोनमार्फत जानकारी गराएपछि स्थानीय प्रहरी चौकी तिरामबाट प्रहरी खटिएको थियो । पछि जिल्लाबाट डीएसपी बस्यालको टिम अनुसन्धानका लागि खटिएको थियो । अनुसन्धानको क्रममा टाउकामा प्रहार गरेर विभत्स तरिकाले हत्या गरेको देखिएको देखिएको थियो । अनुसन्धान गर्दै जाँदा प्रहरीले घरबाट करिब ५० मिटर टाढा रगत लतपतिएको घन समेत फेला पारेको थियो । अपरेशन माण्डवी नाम दिएर अनुसन्धान गरेको प्रहरीले अन्तत २४ घण्टा नबित्दै हत्या आरोपमा पंकजलाई पक्राउ गरेको छ । मृतक परियार दम्पतीका चार छोराहरू रहेकोमा सबै जना वैदेशिक रोजगारीमा भारतका रहेका छन् । तीन छोरीहरू पनि विवाह गरेर दाङमा बस्दै आएका छन् । घरमा परियार दम्पतीमात्रै बस्दै आएका थिए ।
विवाह गर्न नसकेको भनेपछि हत्या प्रहरीका अनुसार पंकजले आफ्नै काकाको हत्या गर्नुमा विवाह सम्बन्धी विषय जोडिएको डीएसपी बस्यालले अनलाइनखबरलाई बताए । पक्राउ प्रतिवादीको भनाई उद्धृत गर्दै डीएसपी बस्यालले भने, ‘करिब एक हप्ता अघि मात्रै पंकजलाई परियार दम्पतीले अहिलेसम्म पनि विवाह गर्न नसकेको ‘थारो’ भनेका रहेछन् । त्यसैको इगोमा हत्या गरेको देखिन्छ ।’ त्यसैगरी यसअघि पनि उनीहरूबीच विभिन्न विषयहरूमा विवाद भइरहने गरेको पनि पाइएको छ । काकाको घरमा पंकज गइरहने तर उक्त कुरा काकालाई मन नपरेपछि गाली गर्ने र उनीहरूबीच विवाद हुने गरेको बस्याले बताए ।
हत्या आरोपमा पक्राउ परेका पंकजले अत्याधिक रक्सी सेवन गर्ने गरेको पनि खुलेको छ । रक्सी सेवन गरेर ९ गते राति साढे १० बजेतिर काकाको घरमा पुगेका थिए । दोस्रो तलाको झ्यालबाट प्रवेश गरी भर्याङबाट भुईंतलामा झरेको उनले बताएका छन् । त्यसपछि परियार दम्पती सुत्ने कोठामा गएर ढोकाको छेउमा राखेको घनले दुवै जनाको टाउकामा ३/३ पटक हानेर हत्या गरेको उनले प्रहरी समक्ष बताएका छन् । प्रहरीले पंकजको घरबाट हत्या गर्दा लगाएको रगत लतपतिएको कपडा समेत बरामद गरेको छ । हत्यापछि हुकमाको पोटुकामा रहेको २२० रुपैयाँ पनि उनले लगेका थिए । उक्त रकममध्ये २०० रुपैयाँ खर्च गरिसकेको अवस्थामा प्रहरीले २० रुपैयाँ पंकजबाट बरामद गरेको छ ।
