नेपाल सुपर लिग : मिनी-अक्सनबाट सात टोलीमा को-को खेलाडी आबद्ध भए?
-
मेराज हास्मी
- today१० फाल्गुन २०८१
आगामी चैत १६ देखि हुने नेपाल सुपर लिग (एनएसएल) फ्रेञ्चाइज फुटबल प्रतियोगिताका लागि शनिबार मिनी-अक्सन भएको छ। ए र बी श्रेणीका खेलाडीका लागि मात्र अक्सन भएको थियो। जसमा ए श्रेणीका १५ खेलाडी र बी श्रेणीका ४५ खेलाडी गरी कुल ६० खेलाडीका लागि बोली लगाइएको थियो। ए श्रेणीका खेलाडीको न्यूनतम मूल्य २ लाख र अधिकतम मूल्य ४ लाख थियो। यस्तै बी श्रेणीको न्यूनतम मूल्य १ लाख ५० हजार र अधिकतम मूल्य २ लाख थियो।
यी खेलाडीका लागि सात टोलीले बोली लगाएका थिए। जसमा ए श्रेणीका आठ खेलाडीले अधिकतम ४ लाख रुपैयाँ पाएका छन्। जसमा पासाङ लामा, दिनेश हेन्जन, मणिकुमार लामा, आशिष गुरुङ, अभिषेक लिम्बू, सुमित श्रेष्ठ, जिलेस्पीजंग कार्की र सन्तोष खत्री अधिकतम ४ लाखमा बिक्री भएका हुन्। अक्सनमा नाम चलेका केही खेलाडी भने बिक्री हुन सकेनन्। जसमा गोलकिपर विकेश कुथु, फरवार्डहरु भरत खवास र नवयुग श्रेष्ठ अनसोल्ड भए।
यसअघि सात टोलीले मार्कीसहित ए/बी श्रेणीका कम्तिमा ती र बढीमा चार जना खेलाडी टोलीमा रिटेन गरेका थिए। यसर्थ शनिबार भएको अक्सनबाट कम्तिमा ६ खेलाडी भित्र्याएका छन्। अब टोलीहरूले सी र डी श्रेणीका खेलाडी ड्राफ्टबाट भित्र्याउनेछन्। प्रत्येक टोलीले २२ देखि २३ खेलाडी राख्न पाउनेछन्। जसमा १ मार्की, २ देखि ३ जना ए श्रेणीका खेलाडी, ६ जना बी श्रेणीका खेलाडी, ४ जना सी श्रेणीका खेलाडी, १ जना डी श्रेणीका खेलाडी, १ जना स्थानीय खेलाडी, ६ जना विदेशी (एसियाका कम्तिमा १ जना खेलाडी सहित) र १ जना एनआरएनए (राख्न/नराख्ने गर्ने निर्णय टोलीको- नेपाल बाहिर बस्ने नेपाली खेलाडी) राख्न पाउनेछन्।
