रास्वपाको राजनीतिक प्रशिक्षण : ६ मुख्य शीर्षकका ५६ वटा विषय समावेश
-
बलिराम श्रीवास्तव
- today१० फाल्गुन २०८१
काठमाडौँ । राष्ट्रिय स्वतन्त्र पार्टी (रास्वपा) केन्द्रीय प्रशिक्षण विभागले केन्द्रीय समितिका सदस्यहरूलाई राजनैतिक प्रशिक्षण सञ्चालन गरेको छ । शुक्रबारदेखि सञ्चालन भएको राजनैतिक प्रशिक्षणको पाठ्यक्रम केन्द्रीय समितिबाट स्वीकृत गरिएको थियो । नयाँ बन्दै गरेको संगठनलाई प्रशिक्षण गर्दै जाने योजना स्वरूप रास्वपाले केन्द्र देखि प्रशिक्षण आरम्भ गरेको हो। यस अघि उपलब्ध विज्ञको आधारमा रास्वपाले प्रशिक्षण गर्दै आएको थियो । रास्वपाको स्वीकृत पाठ्यक्रमको पहिलो प्रशिक्षण केन्द्रीय कार्यालय वनस्थली काठमाडौँमा आयोजना गरिएको छ । पार्टी कार्यवाहक सभापति डोल प्रसाद अर्यालले प्रशिक्षणको औचित्य र महत्त्व बारे प्रकाश पार्दै प्रशिक्षण सुरु भएको थियो ।
प्रशिक्षणमा कार्यवाहक सभापति डोल प्रसाद अर्याल, उपसभापति डा स्वर्णिम वाग्लेले, कार्यवाहक महामन्त्री, सहमहामन्त्रीहरू, कोषाध्यक्ष, सहकोषाध्यक्ष, केन्द्रीय सदस्यहरू, सांसदहरूको उपस्थिति रहेको थियो । रास्वपाले यो प्रशिक्षणमा मूलतः ६ वटा मुख्य विषयहरू प्रशिक्षणमा समेटेको छ । जसमा राजनीतिक प्रशिक्षण, शासन प्रणाली, समाज, सामाजिक न्याय र कानुन, अर्थराजनीति र भूराजनीति, सांगठनिक, जिम्मेवारी र लक्ष्य र प्रशासनिक व्यवस्था रहेका छन् । प्रशिक्षणका ६ मुख्य शीर्षकहरूलाई १५ भागमा विभाजन गरी कुल ५६ वटा विषयहरूमा दुई दिने प्रशिक्षण सञ्चालन भएको छ । प्रशिक्षणमा कक्षागत प्रशिक्षण, व्यवहारिक अभ्यास र दस्ताबेज अध्ययनलाई विधिको रूपमा लिइएको छ । जसमा व्याख्यान, प्रस्तुति, र समूह छलफल, घटना अध्ययन,
भूमिकानाटक, र सामूहिक कक्षा, सम्बन्धित पुस्तक, संविधान, र पार्टी दस्ताबेजहरू अध्ययन जस्ता विधिहरू समावेश गरिएको छ । रास्वपाले केन्द्रीय प्रशिक्षणमा प्रयोग गरेको सामाग्रीका आधारमा प्रदेश, जिल्ला र स्थानीय पालिका संगठनलाई समेत प्रशिक्षण दिने तयारी गरेको छ । पार्टीले प्रशिक्षणको मूल्याङ्कन विधि समेत बनाई मूल्याङ्कन गर्ने गरेको जानकारी गराइन्छ ।
