चीनले वितरण गरेको साइकल जलाइयो
-
बिरेन्द्र यादब
- today१० फाल्गुन २०८१
काठमाडौँ । मधेस प्रदेशको पर्सामा चीनको सहयोगमा वितरण गरिएको साइकल त्यहाँकाको एक विद्यार्थी संगठनले जलाएको छ । चिनियाँ सहयोगको नाममा पुराना र कमसल साइकल वितरण गरिएको आरोप लगाउँदै राष्ट्रिय विद्यार्थी परिषद् पर्साले सो साइकल जलाएको हो । परिषद्मा रहेका विद्यार्थीहरूले लक्ष्मणवा (प्रतिमा )चौकमा प्रदर्शन गर्दै साइकल जलाएको परिषद्का अध्यक्ष विनोद यादवले बताए । प्रदर्शनकारीहरूले ‘चीनको चलाखी अब चल्दैन – मधेसलाई सम्मान चाहिन्छ !’ र ‘पुरानो साइकल, नयाँ धोका–चीन, अब हामीलाई मूर्ख नबनाऊ !’ जस्ता नारा लगाएका थिए ।
विद्यार्थी परिषद् पर्साका अध्यक्ष विनोद यादवले चीनले मधेसका विद्यार्थीहरूलाई अपमानित गर्न यस्ता कमसल सामग्रीहरू सहयोगको रूपमा पठाएको आरोप लगाएका छन् । मधेसलाई अनुदानको नाममा गुणस्तरहीन सामग्री उपलब्ध गराउने कार्य अस्वीकार्य रहेको बताउँदै उनले यदि यस्ता अपमानजनक गतिविधिहरू दोहोरिए भने कडा आन्दोलन गर्ने चेतावनी दिएका छन् । यसअघि पनि मधेस प्रदेशका तत्कालीन सरकारले २०७८ मा ‘बेटी पढाऊ, बेटी बचाउ’ अभियान अन्तर्गत वितरण गरिएका साइकलमा व्यापक अनियमितता देखिएको थियो । त्यसमा पनि विद्यार्थी परिषद्ले विरोध गरेको थियो । अहिलेको घटनामा भने चीनले मधेसलाई सहयोगको नाममा कमसल साइकलहरू दिएको गुनासो गरेको छ ।
वीरगन्ज महानगरपालिकाको पिपरास्थित श्रीनरसिंह माध्यमिक विद्यालयका विद्यार्थीलाई दुई सय थान चाइनिज साइकल वितरण गरिएको थियो । अन्तर्राष्ट्रिय लभ साइकल नेपाल अभियानले आयोजना गरेको सो कार्यक्रममा माघको पहिलो हप्ता चाइना फाउन्डेसनले सो साइकल वितरण गरेको थियो ।
