सर्लाहीमा पत्रकार साहमाथि आक्रमण, प्रहरीले समेत लापरबाही गरेको आरोप
-
संजय कुशवहा
- today१० फाल्गुन २०८१
वीरगञ्ज । सर्लाही जिल्लाका वरिष्ठ पत्रकार तथा प्राइम टेलिभिजनका संवाददाता, सौर्य अनलाइन खबरका प्रधान सम्पादक विपेन्द्र कुमार साहमाथि शुक्रवार दिउँसो योजनाबद्ध आक्रमण भएको छ । सर्लाहीको मलंगवास्थित मालपोत कार्यालयमा राजकपुर मण्डलको नेतृत्वमा एक समूहले पत्रकार साहमाथि हातपात गर्दै कार्यालय प्रमुखकै कार्यकक्षबाट बाहिर निकालेर कुटपिट गरेको हो । पीडितका साहका अनुसार, आक्रमण पुरानो लेनदेन विवादका कारण भएको थियो । तीन वर्षअघि उनले राजकपुर मण्डलसँग १५ लाख रुपैयाँको ऋण कारोबार गरेका थिए । बारम्बार ऋण फिर्ता माग्दा मण्डलले ऋण फिर्ता गर्न अस्वीकार गरेपछि साहले सर्लाही जिल्ला अदालतमा मुद्दा दायर गरेको साहले बताए ।
जिल्ला र जनकपुर उच्च अदालतले समेत साहको पक्षमा फैसला भएको थियो । अदालतको आदेशअनुसार मण्डलको दुई कित्ता जग्गा दाखिल-खारिज गराउन साह मालपोत कार्यालय पुगेका थिए, र सोही समयमा मण्डलको समूहले उनमाथि हमला गरेको हो ।पत्रकार साहका अनुसार, घटनापछि उनले प्रहरीमा जाहेरी दिन प्रयास गरे पनि प्रहरीले घटना लापरबाहीपूर्ण तरिकाले लिएको छ । उनले आरोप लगाउँदै भने, “प्रहरीले सुरुमै नै घटनालाई हल्का रूपमा लिएको देखिन्छ ।” जाहेरी बुझाउन जाँदा, प्रहरीले “किटानी जाहेरी लिएर आउनू” भन्ने प्रतिक्रिया दिएको उनको भनाइ छ ।
साहले जाहेरी लिएर पुनः प्रहरीमा गएपछि प्रहरीले जाहेरी लिन अस्वीकार गरेको र यसलाई सत्ता र शक्तिको दबाबमा भएको दाबी गरेका छन् । पत्रकार साहले घटना माथि स्वतन्त्र छानबिन र दोषीलाई कडा कारबाहीको माग गर्दै विषयलाई गम्भीर रूपमा लिने आग्रह गरेका छन् । उनले प्रहरी प्रशासनको लापरबाही र पक्षपाती व्यवहारलाई लिएर गम्भीर चिन्ता व्यक्त गर्दै न्यायको लागि सङ्घर्ष जारी राख्ने सङ्कल्प व्यक्त गरेका छन् ।
