विदेशबाट फर्किएका विद्यार्थीलाई पूर्वाञ्चल विश्वविद्यालयले क्रेडिट ट्रान्सफर सुविधा दिने
-
बिशाल यादब
- today१० फाल्गुन २०८१
वीरगञ्ज । पूर्वाञ्चल विश्वविद्यालयले विदेशबाट फर्किएका नेपाली विद्यार्थीहरूलाई क्रेडिट ट्रान्सफरको सुविधा दिने भएको छ । भारतको ओडिशास्थित कालिङ्गा इन्स्टिच्युट अफ इन्डस्ट्रियल टेक्नोलोजी (किट) विश्वविद्यालयबाट अध्ययन पूरा नगरी फर्किएका विद्यार्थीलाई विश्वविद्यालय अन्तर्गतका आङ्गिक र सम्बन्धन प्राप्त क्याम्पसहरूमा क्रेडिट ट्रान्सफरको सुविधा उपलब्ध गराइनेछ । विश्वविद्यालयको सूचना प्रविधि महाशाखाले शुक्रवार एक विज्ञप्ति जारी गर्दै यस नयाँ व्यवस्था सुरु गरिएको जानकारी दिएको हो ।
विज्ञप्तिमा भनिएको, “विदेश अध्ययनको लागि गएका तर अध्ययन पूरा नगरी फर्किएका विद्यार्थीहरूलाई नेपाल सरकारको समन्वयमा आवश्यक प्रक्रिया पूरा गरेपछि यो सुविधा लिन सक्नेछन् ।” यस कदमले विदेशबाट फर्किएका विद्यार्थीहरूको शैक्षिक यात्रा निरन्तरता दिन मद्दत पुग्ने विश्वास विश्वविद्यालयले व्यक्त गरेको छ । तथापि, किटमा अध्ययनरत विद्यार्थीहरूको आत्महत्या प्रकरण पछि असुरक्षाको कारणले धेरै नेपाली विद्यार्थीहरू नेपाल फर्किएका छन् । सुरक्षाको कारण नेपाल फर्किएका विद्यार्थीहरू क्याम्पसको आग्रह बाबजुद फर्किन तयार छैनन् ।
यसैबिच, पूर्व शिक्षामन्त्री र प्रतिनिधि सभा सदस्य सुमना श्रेष्ठले उक्त व्यवस्था कार्यान्वयन गर्नका लागि आफूले सक्दो पहल गरिरहेको बताइन् । सामाजिक सञ्जालमा उनले लेखेकी छिन्, “यो एक सानो सफलता हो, तर हामीले गर्नुपर्ने धेरै छ । म आफूले सक्ने जति गर्छु ।”यस व्यवस्थाले विदेशबाट फर्किएका विद्यार्थीहरूलाई सहज शैक्षिक यात्रा पुनः सुरु गर्न अवसर दिने अपेक्षा गरिएको छ ।
