नापी र मालपोत कार्यालय बाराका आठजनाविरुद्ध भ्रष्टाचार मुद्दा दायर
-
अशोक यादब
- today९ फाल्गुन २०८१
बारा । अख्तियार दुरुपयोग अनुसन्धान आयोगले नापी कार्यालय बारा र मालपोत कार्यालय बाराका अधिकृतसहित आठजनाविरुद्ध भ्रष्टाचार मुद्दा दायर गरेको छ। आयोगले बिहीबार विशेष अदालत काठमाडौंमा मुद्दा दायर गरेको हो।
एक कठ्ठा जग्गालाई तीन कठ्ठा बनाई अनियमित रूपमा किनबेच गर्ने प्रकरणमा संलग्न रहेको आरोपमा उनीहरुविरुद्ध भ्रष्टाचार मुद्दा दायर गरिएको हो।
अख्तियारका अनुसार मालपोत कार्यालय बाराका अधिकृत सुमनप्रसाद चौधरी, तत्कालीन नायब सुब्बा बुधनप्रसाद यादव, नापी कार्यालय बाराका तत्कालीन नापी अधिकृत तथा हाल अवकाशप्राप्त दीनानाथ मिश्र, तत्कालीन सर्वेक्षक तथा हाल नापी कार्यालय पर्सामा कार्यरत शिवबालक साह, तत्कालीन सर्वेक्षक सुनिल कुमार झा, लेखापढी व्यवसायी जयलाल सहनी, जग्गाधनी सुदामा प्रसाद चौधरी थारु र रामपति देवी थरुनी विरुद्ध विशेष अदालतमा मुद्दा दायर गरिएको हो।
अख्तियारका अनुसार बाराको साविक डुमरवाना गा.वि.स. वडा नं. ६ क मा रहेको ०-१-० क्षेत्रफल भएको जग्गालाई किर्ते गरेर ०-३-१० बनाई बिक्री गरिएको पाइएको छ। त्यस्तै, ०-२-१० क्षेत्रफल भएको जग्गालाई ०-६-० बनाई नापी कार्यालय र मालपोत कार्यालयको मिलेमतोमा श्रेस्ता पूर्जा तयार गरी ठगी गरिएको अनुसन्धानबाट खुलेको छ।
अख्तियारले भ्रष्टाचार निवारण ऐनअनुसार प्रत्येक प्रतिवादीलाई १ लाख ५० हजार रुपैयाँ जरिवाना र कैद सजायको माग गर्दै विशेष अदालतमा मुद्दा दायर गरेको छ।
