देशभरका चिकित्सक आन्दोलित, आकस्मिक बाहेकका सेवा बन्द गर्ने चेतावनी
-
अशोक यादब
- today७ फाल्गुन २०८१
वीरगञ्ज । देशभरका चिकित्सकले आजदेखि आन्दोलन सुरु गर्ने भएका छन् । नेपाल चिकित्सक सङ्घको आह्वानमा आफ्ना माग पूरा नभएको भन्दै उनीहरूले कालो पट्टी बाँधेर आन्दोलन सुरु गर्न लागेका हुन् ।
सरकारलाई दिएको ४८ घण्टाको समयभित्र माग पूरा नभएपछि उनीहरू आजदेखि आ–आफ्नो कार्यालयअगाडि कालो पट्टी बाँधेर एक घण्टा धर्ना बस्ने भएका हुन् । आज र भोलि देशभरका स्वास्थ्य संस्थामा आन्दोलनका कार्यक्रम हुने सङ्घले जनाएको छ ।
सङ्घले स्वास्थ्य सेवामा चिकित्सक तथा स्वास्थ्यकर्मीहरूको थप दरबन्दी अविलम्ब सिर्जना गरी यथाशीघ्र विज्ञापन गरिनुपर्ने, अस्पताल विकास समितिअन्तर्गत कार्यरत सम्पूर्ण चिकित्सकहरूलाई स्थायी नियुक्ति प्रदान गरिनुपर्ने, चिकित्सक तथा स्वास्थ्यकर्मीहरूको नियुक्ति तथा तलब भत्तामा एकरूपता कायम गरी जोखिम भत्तालगायत थप भत्ता उपलब्ध गराउनुपर्ने लगायतका माग राखेको छ ।
सरकारले माग सम्बोधन नगरेमा आकस्मिक सेवा बाहेकका सम्पूर्ण सेवा बन्द गर्न आफूहरू बाध्य हुने सङ्घले चेतावनी पनि दिएको छ । यसबाट उत्पन्न हुन सक्ने कुनै पनि परिस्थितिको जिम्मेवारी नेपाल सरकारले नै लिनुपर्ने सङ्घले स्पष्ट पारेको छ ।
सङ्घले आम नागरिकहरूलाई पर्न सक्ने असुविधाप्रति गहिरो दुःख व्यक्त गर्दै आवश्यक सहयोगका लागि अपिल समेत गरेको छ ।
