नेपाल रेडक्रस सोसाइटी पर्सा जिल्ला शाखाको ५३ औँ जिल्ला अधिवेशन सम्पन्न, भोली निर्वाचन
-
बलिराम श्रीवास्तव
- today६ फाल्गुन २०८१
वीरगञ्ज । नेपाल रेडक्रस सोसाइटी पर्सा जिल्ला शाखाको ५३औँ जिल्ला अधिवेशन वीरगञ्जस्थित रोयल पार्टी प्यालेसमा सम्पन्न भएको छ ।
सभापति वीरेन्द्र राज कँडेलको अध्यक्षतामा सम्पन्न कार्यक्रममा प्रमुख अतिथि नेपाल रेडक्रस सोसाइटीका केन्द्रीय सदस्य नारायण प्रसाद तिमिल्सिनाले पानसमा दीप प्रज्वलन गर्दै तथा जा. हेनरी ड्युनाँको तस्बिरमा टिका र माल्यार्पण गरी औपचारिक उद्घाटन गरेका थिए ।
कार्यक्रममा नेपाल रेडक्रस सोसाइटी पर्सा जिल्ला शाखाका कोषाध्यक्ष महन्त प्रसाद यादवले आर्थिक प्रतिवेदन प्रस्तुत गरेका थिए । जिल्लाका विभिन्न २२ वटा उप-शाखाहरूले गरेको उत्कृष्ट कार्यका आधारमा योगदान दिने व्यक्तिहरूलाई सम्मान समेत गरिएको थियो ।
सम्मानित व्यक्तिहरूमा वरिष्ठ सल्लाहकार नरेन्द्र साह (भूपेन्द्रलाल स्मृति पुरस्कार), नेपाल रेडक्रस सोसाइटी रेशमकोठीका सचिव लालबाबु सिंह (युवा स्वयंसेवक पुरस्कार), तथा वर्षभरि चार पटक रक्तदान गर्ने नियमित रक्तदाताहरू परेका थिए ।
कार्यक्रमका प्रमुख अतिथि तथा निर्वाचन अधिकृत नारायण प्रसाद तिमिल्सिनाले नेतृत्वको चाहना राख्नु राम्रो भए तापनि सहमतिको आधारमा अगाडि बढ्न आग्रह गरे ।
जिल्ला अधिवेशन सम्पन्न भएसँगै पर्सा जिल्ला शाखाको नयाँ कार्यसमितिको निर्वाचन भोलि मङ्गलवार जिल्ला शाखाको सभा हलमा हुने जानकारी दिइएको छ ।
कार्यक्रम सञ्चालन नेपाल रेडक्रस सोसाइटी पर्सा जिल्लाका सह-मन्त्री साबिर अहमद एराजले गरेका थिए । अन्त्यमा, सभापति वीरेन्द्र राज कँडेलले सहभागी सम्पूर्ण रेडक्रसकर्मीहरूलाई बधाई दिँदै धन्यवाद व्यक्त गरेका थिए ।
अधिवेशनमा नेपाल रेडक्रस सोसाइटी मधेस प्रदेशका अध्यक्ष फुल मोहम्मद मियाँ, वीरगञ्ज महानगरपालिका – ९ वडाध्यक्ष जवाहिर प्रसाद गुप्ता, दिनानाथ रौनियार, गुडि साह, नेपाल रेडक्रस सोसाइटी पर्सा शाखाका मन्त्री विनोद गिरी, नरेन्द्र साह, युवराज खडका लगायतका विशिष्ट व्यक्तिहरूको उपस्थिति रहेको थियो ।
साथै, समाजसेवी प्रकाश उपाध्याय, मुना खनाल, सामुदायिक प्रहरी केन्द्र छपकैयाका अध्यक्ष ग्यासुदिन ठकुराई, कुम्हालटोल सामुदायिक प्रहरीका सचिव श्रवणबहादुर रायमाझी लगायतका व्यक्तिहरूको पनि सहभागिता रहेको थियो ।
