दक्षिण-पूर्वी अमेरिकामा आएको बाढीबाट ९ जनाको मृत्यु
-
कृष्ण प्रसाद शर्मा
- today५ फाल्गुन २०८१
काठमाडौँ । मुसलधारे वर्षापछि आएको बाढीबाट दक्षिण-पूर्वी अमेरिकामा ९ जनाको मृत्यु भएको छ । दक्षिण पुर्वी अमेरिकाको केन्टकी, जर्जिया, अलाबामा, मिसिसिपी, टेनेसी, भर्जिनिया, पश्चिम भर्जिनिया र उत्तरी क्यारोलिना बाढीबाट प्रभावित भएको छ । बाढीले अधिकांश भागहरू डुबाएपछि हजारौं प्रभावित भएका छन् । बाढीका कारण केन्टकी राज्यका सयौं घरहरु डुबानमा परेका छन् ।
केन्टकी राज्यका गभर्नर एन्डी बेशियरले आफ्नो राज्यमा आठ जनाको मृत्यु भएको बताउँदै मृतकको संख्या बढ्न सक्ने भन्दै सबैलाई सचेत रहन अपिल गर्नुभएको छ । बाढीमा फसेका हजारौंको उद्धार कार्य जारी छ । राष्ट्रिय मौसम सेवाका अनुसार मुशलधारे वर्षा अझै केही दिन जारी रहने भएकाले सतर्क रहन आदेश जारी गरिएको छ । राज्य सरकारले बाढी प्रभावितलाई सुरक्षित स्थानतर्फ स्थानान्तरण गरेको छ ।
