ट्रेन र बसमा पाएन सिट: मोटर बोट चढेर महाकुम्भमा स्नान गर्न पुगे बिहारका सात युवक
-
नाजिर हुसैन
- today५ फाल्गुन २०८१
वीरगञ्ज । भारतको प्रयागराजमा १२ वर्ष पश्चात् लागेको महाकुम्भमा भक्तजनहरूको अपार भीड देखिएको छ । ट्रेन तथा सडकहरू अत्यधिक भिडभाडका कारण अस्तव्यस्त भएका छन् । तर, कुनै पनि अवरोधका बाबजुद त्रिवेणी सङ्गममा स्नान गर्न श्रद्धालुहरूको उत्साह कम भएको छैन । यसैबिच, बिहारको बक्सरबाट सात जना युवाले प्रयागराज पुग्न एक अनौठो उपाय अपनाएको भिडियो सामाजिक सञ्जालमा भाइरल भइरहेको छ । युवाहरूले ट्रेन र बसमा सिट नपाएपछि गङ्गा नदीमार्फत मोटर बोट चढेर करिब ५ सय ५० किलोमिटरको यात्रा पूरा गरेका हुन् ।
फेब्रुअरी १० र ११ मा प्रयागराजका सडक तथा रेलमार्ग अत्यधिक भिडभाडका कारण अवरुद्ध भएपछि युवाहरूले मोटर बोटमार्फत जाने निर्णय गरेका थिए । बिहारको बक्सरबाट सुरु भएको उनीहरूको यात्रा गाजीपुर र वाराणसी हुँदै फेब्रुअरी १२ को बिहान प्रयागराजमा सम्पन्न भएको थियो । करिब ८० घण्टा लामो यात्रामा उनीहरूले दुई वटा इन्जिन जडित बोट प्रयोग गरेका थिए । मोटर बोटमा खाना पकाउने ग्यास सिलिन्डर, स्टोभ, पेट्रोल, खाद्यान्न तथा आवश्यक सामग्री राखिएको थियो । बोटमा सात जना सवारमध्ये दुई जना पालैपालो बोट चलाउने जिम्मेवारीमा थिए भने अन्य पाँच जना विश्राम गर्दै यात्रामा सामेल भएका थिए ।
कुल २० हजार रुपैयाँ खर्चिएर उनीहरूले प्रयागराजसम्मको यात्रा सफलतापूर्वक सम्पन्न गरेका छन् । प्रयागराज पुग्नुअघि उनीहरू सङ्गमभन्दा करिब पाँच किलोमिटर पर बोटबाट ओर्लिएर बाँकी यात्रा सजिलै पूरा गरेका थिए । युवाहरूको अनौठो यात्राको भिडियो सामाजिक सञ्जालमा भाइरल भएपछि प्रयोगकर्ताहरूले मिश्रित प्रतिक्रिया दिएका छन् । कतिपयले उनीहरूको आइडियालाई प्रशंसा गर्दै “जहाँ चाह, त्यहाँ राह” भनेका छन् भने कसैले रमाइलो शैलीमा “यो उपाय मोदीजीलाई पहिले किन भनेनौ? सबैलाई बोटमा पठाउँथे!” भनेर व्यङ्गसहित टिप्पणी गरेका छन् । लाखौँ भक्तजनहरूको भिडबिच सात जना युवाले अपनाएको वैकल्पिक यात्रा अहिले सामाजिक सञ्जालमा चर्चाको विषय बनेको छ । महाकुम्भमा सहभागी हुन उनीहरूको श्रद्धा मात्र नभई सिर्जनात्मक सोच र दृढ सङ्कल्प पनि यस यात्राबाट झल्किएको छ ।
