जनकपुरका थप चार अस्पतालमा मुख्यमन्त्री सिंहले लगाए ताला
-
बिशाल यादब
- today५ फाल्गुन २०८१
वीरगञ्ज । मधेस प्रदेशका मुख्यमन्त्री सतिशकुमार सिंहले अवैध रूपमा सञ्चालनमा रहेका चार अस्पताललाई बन्द गरिदिएका छन् । आइतबार जनकपुरधाममा स्वास्थ्य मन्त्रालयका अधिकारीहरूसहित निरीक्षणमा निस्केका मुख्यमन्त्री सिंहले विभिन्न अस्पतालहरूको अनुगमन गरेका थिए । अनुगमनमा जनकपुरधामस्थित कृष्णा मेडिकल एन्ड टेक्निकल रिसर्च सेन्टर, गीता श्री इएनटी स्पेसियालिटी क्लिनिक, नवजीवन हस्पिटल, वैदेही हस्पिटल, जनक मेमोरियल हस्पिटल, जनकपुर मोडल हस्पिटल, गोदावरी हस्पिटल, कृष्णा हस्पिटल र एडभान्स सिटी स्क्यान गरी ९ वटा स्वास्थ्य संस्थाको अनुगमन गरिएको थियो ।
अनुगमनका क्रममा जनक मेमोरियल हस्पिटल, जनकपुर मोडल हस्पिटल, गोदावरी हस्पिटल र कृष्णा हस्पिटल प्रालिलाई अवैध रूपमा सञ्चालन भइरहेको कारण बन्द गरिएका छन् । यस्तै, कृष्णा मेडिकल एन्ड टेक्निकल रिसर्च सेन्टरलाई फोहोर मैला व्यवस्थापनमा सुधार गर्न निर्देशन दिइएको छ । अन्य अस्पतालहरू जस्तै गीता श्री इएनटी स्पेसियालिटी क्लिनिकलाई दर्ता प्रक्रियामा केही आपत्ति रहेका कारण सोमबार ११ बजे कागजपत्रसहित मुख्यमन्त्री कार्यालयमा बोलाइएको छ । नवजीवन हस्पिटल र वैदेही हस्पिटलले नवीकरण नगरेको र अपडेट नगरेको कारणसमेत शुक्रवारदेखि स्वास्थ्य मन्त्रालयसँग स्पष्टीकरण माग गरिएको छ ।
यसै गरी, एडभान्स सिटी स्क्यानको नवीकरण प्रक्रिया दुई वर्षदेखि नवीकरण नगरेको कारण अनुगमनमा राखिएको छ । मुख्यमन्त्री सिंहले अस्पतालहरूमा बिरामीहरूको उपचार बन्द नगरिएको भन्ने शङ्का लागेपछि, अस्पताल सञ्चालकहरूलाई सिसिटिभी फुटेजसहित पनि कार्यालयमा उपस्थित हुन निर्देशन दिएका छन् ।
