मधेशको शिक्षा मन्त्रालयले माग्यो १३२ जना स्वयंसेवक शिक्षक
-
अशोक यादब
- today१ फाल्गुन २०८१
मधेश प्रदेशको शिक्षा तथा संस्कृति मन्त्रालयले एकैसाथ ठूलो संख्यामा स्वंयसेवक शिक्षकको भर्ना खुलाएको छ । शिक्षा मन्त्रालयका निमित्त सचिव दिलिपकुमार ठाकुरले माघ ३० गते स्वंयमसेवक शिक्षकका लागि भर्ना आह्वान गरिएको बताए । शिक्षा मन्त्रालयले नेपाली विषयका २० जना, अंग्रेजी विषयमा ४० जना, गणित विषयका ४२ जना र विज्ञान विषयका ३० जना स्वयंसेवक शिक्षक भर्नाका लागि सार्वजनिक आह्वान गरेको छ ।एकैसाथ १ सय ३२ जना स्वयंसेवक शिक्षक मागेको मधेश प्रदेश सरकारले शिक्षक भर्ना भएपछि विषयगत शिक्षक अपुग रहेका सामुदायिक विद्यालयमा स्वयंसेवक शिक्षक खटाउने तयारी गरेको छ ।
शिक्षा मन्त्रालयको वार्षिक स्वीकृत कार्यक्रम स्वयंसेवक शिक्षक कार्यक्रम सञ्चालनका लागि माध्यमिक तह कक्षा ९ र १० का लागि १ सय ३२ जना स्वयंसेवक शिक्षक मागेको हो । इच्छुक शिक्षकले १५ दिनभित्र दरखास्त फारम भरेर जनकपुरस्थित मन्त्रालयमा बुझाउन अनुरोध गरिएको छ ।स्वंयमसेवक शिक्षकका लागि १८ वर्ष पूरा गरी ४० वर्ष ननाघेका, सम्बन्धित विषयमा स्नातक वा सो सरह उत्तीर्ण गरी तालिम लिएको र शिक्षक सेवा आयोगबाट सम्बन्धीत तहको स्थायी अध्यापन अनुमति पत्र लिएको हुनुपर्ने मापदण्ड तोकिएको छ ।
