समस्याको पोको अघि सारेर आन्दोलन गर्दै एकीकृत समाजवादी
-
संजय कुशवहा
- today१ फाल्गुन २०८१
काठमाडौँ । आन्दोलनद्वारा पार्टी निर्माणको प्रस्ताव अघि सारेको नेकपा (एकीकृत समाजवादी) ले महँगी, भ्रष्टाचार, कुशासन लगायतका विभिन्न समस्याहरूलाई आन्दोलनका मुख्य एजेन्डा बनाउने भएको छ । आगामी साता (फागुन ८ र ९) गते बस्ने पार्टीको केन्द्रीय कमिटी बैठकले आन्दोलनका कार्यक्रम पारित गरेर सडकमा होमिने तयारी भएको उपाध्यक्ष तथा प्रचार विभाग प्रमुख प्रकाश ज्वालाले जानकारी दिए । नेता ज्वालाका अनुसार केन्द्रीय कमिटी बैठकले सैद्धान्तिक रूपमा ‘आन्दोलनद्वारा पार्टी निर्माण’ भन्ने कार्य योजना पारित गरेपछि आन्दोलनका कार्यक्रम अघि बढ्नेछन् ।
‘भ्रष्टाचार बढेको छ, विभिन्न वर्ग समुदायका मिटरव्याजी, सहकारी समस्या, महँगी बढेको छ, उखु किसानका समस्या छन्, सुशासन कायम हुन सकेको छैन यिनै विषयलाई समेटेर आन्दोलनका कार्यक्रम तय गर्छौँ ’, ज्वालाले भने, ‘संविधान संशोधनका मुद्दालाई समेत एजेन्डा बनाउँछौ ।’
केन्द्रीय कमिटी बैठक लगत्तै एक महिनाभित्र तल्ला कमिटीहरूमार्फत सुझाव सङ्कलन गर्ने र तिनै सुझावका आधारमा आन्दोलनको मिति र कार्यक्रमको मोडालिटीलाई अन्तिम रूप दिने तयारी भएको नेता ज्वालाले जानकारी दिए । ‘केन्द्रीय कमिटी बैठकले पारित गर्ने दस्तावेजमै आन्दोलनका एजेन्डा र मोडालिटी र स्टेपहरु समेटिन्छन्’, ज्वालाको भनाइ छ । नेकपा एकीकृत समाजवादीले यसअघि महासचिव घनश्याम भुसालको नेतृत्वमा आन्दोलन परिचालन समिति गठन गरिसकेको छ ।
