रौतहटमा स्कार्पियो र ट्रक ठोक्किँदा ठूलो दुर्घटना, पाँच जना घाइते
-
बिशाल यादब
- today२९ माघ २०८१
वीरगञ्ज । रौतहटको चन्द्रपुर नगरपालिकामा मङ्गलवार बिहान भएको सवारी दुर्घटनामा पाँच जना गम्भीर घाइते भएका छन् । पूर्व-पश्चिम राजमार्ग अन्तर्गत चन्द्रपुर-५ स्थित चाँदी पुल नजिक चन्द्रनिगाहपुरबाट सर्लाही जाँदै गरेको स्कार्पियो र विपरीत दिशाबाट आइरहेको मालवाहक ट्रक आपसमा ठोक्किँदा भएको दुर्घटनामा स्कार्पियोमा सवार पाँच जना घाइते भएका हुन् ।
दुर्घटनामा मौलापुर नगरपालिका-३ का २० वर्षीय सुदिप कुमार यादव, १८ वर्षीय प्रशान्त ठाकुर, २१ वर्षीय राम विनय महतो, १८ वर्षीय प्रदीप कुश्वाहा र २८ वर्षीय सन्तोष कुश्वाहा घाइते भएका छन् । घाइतेहरूको चन्द्रपुरस्थित चन्द्रपुर अस्पतालमा उपचार चलिरहेको प्रहरीले जनाएको छ । अस्पतालका प्रमुख डा. सुभाष चौधरीका अनुसार सन्तोष कुश्वाहाको अवस्था गम्भीर छ भने अन्यको उपचार जारी छ ।
इलाका प्रहरी कार्यालय चन्द्रनिगाहपुरले दुर्घटनामा संलग्न ट्रकका चालक २८ वर्षीय फुरी तामाङलाई नियन्त्रणमा लिएको छ । दुर्घटनाको कारणबारे थप अनुसन्धान भइरहेको इलाका प्रहरी कार्यालय चन्द्रनिगाहपुरका प्रमुख, प्रहरी निरीक्षक (इन्स्पेक्टर) विशाल तामाङले जानकारी दिए ।
