अझै रोकिएन सुशील वनस्पति (राजहंश) उद्योगको बदमासी, सिर्सिया नदीमा सोझै फोहर पानी मिसाउँदै
-
बलिराम श्रीवास्तव
- today२८ माघ २०८१
वीरगञ्ज । वीरगञ्ज महानगरपालिका – २१ परवानीपुरस्थित सुशील वनस्पति (राजहंश) उद्योगले सरिसवा (सिर्सिया) नदीमा निरन्तर रूपमा रसायनयुक्त फोहोर पानी मिसाउँदै पाइएको छ । छठ पर्वको अवसरमा समेत नदीलाई प्रदूषित बनाएको उद्योगले अझै पनि नदीलाई प्रदूषित बनाउने कामलाई निरन्तर जारी राखेको हो । उद्योगबाट निस्किने रसायनयुक्त फोहर र पानीलाई प्रशोधन गरेर मात्र नदीमा मिसाउन वीरगञ्ज महानगरपालिकाको पटक–पटकको आग्रहलाई बेवास्ता गर्दै उद्योगले सिर्सियालाई नदीलाई प्रदूषित गरेको स्थानीय युवा कुमार कृष्णले आरोप लगाए ।
उनले सामाजिक सञ्जाल मार्फत उद्योगको लापरबाहीविरुद्ध आवाज उठाउँदै सम्बन्धित वडा, वीरगञ्ज महानगरपालिका र स्थानीय प्रशासनको ध्यानाकर्षण समेत गराएका छन् । सामाजिक सञ्जालमा एउटा भिडियो साझा गर्दै उनले उद्योगले नदीमा फोहोर मिसाइएको प्रमाण समेत प्रस्तुत गरेका छन् । वीरगञ्ज - २१ वडाध्यक्ष राधाकृष्ण रौनियारले सुशील वनस्पति (राजहंश) उद्योगले सुरुदेखि नै महानगरपालिका तथा सरोकारवाला निकायहरूको निर्देशन अवज्ञा गर्दै आएको बताए । “हामीले पटक-पटक ताकेता गर्यौँ, तर उद्योगले प्रदूषित पानी फाल्न छोडेको छैन । अब यस विषयमा कडा कानुनी कारबाही हुनु आवश्यक छ,” उनले भने ।
स्थानीय बासिन्दाले वातावरणीय प्रदूषणको कारण सिर्सिया नदीको पानी अत्यधिक हानिकारक बनेको भन्दै तुरुन्त उद्योगविरुद्ध कानुनी कारबाहीको माग गरेका छन् । प्रदूषणले धार्मिक आस्था मात्र नभई स्थानीय बासिन्दाको स्वास्थ्यमा गम्भीर असर पुर्याइरहेको उनीहरूको भनाइ छ । सिर्सिया नदीलाई प्रदूषणमुक्त बनाउन तथा पर्यावरणीय न्यायको पक्षमा सरकार, महानगरपालिका र सरोकारवाला निकायलाई तत्काल कदम चाल्न स्थानीयहरूले आग्रह समेत गरेका छन् । यस विषयमा उद्योग सञ्चालक रतन केडियासँग बुझ्ने प्रयास गर्दा उनले प्रतिक्रिया दिन अस्वीकार गरेका छन् । यसअघि पनि उनले नगरपालिकाको निर्देशनलाई बेवास्ता गर्दै आएको स्थानीयले आरोप लगाएका छन् ।
