झन्डै १३ लाखसहित पक्राउ परेका तिन जनाको सम्बन्धी सूचना लुकाउँदै बारा प्रहरी
-
संजय कुशवहा
- today२८ माघ २०८१
वीरगञ्ज । जिल्ला प्रहरी कार्यालय बाराले स्रोत नखुलेको झन्डै १३ लाख रुपैयाँ भन्दा बाढी रकमसहित पक्राउ गरेको तीन जनाको सम्बन्धमा औपचारिक जानकारी दिन आनाकानी गरिरहेको छ । प्राप्त सूचना अनुसार, स्रोत नखुलेको रकमसहित बारा प्रहरीले एक जना भारतीय नागरिकसहित पहिचान नखुलेको अन्य दुई जनालाई नियन्त्रणमा लिएको छ । यद्यपि यस विषयमा प्रहरीले आधिकारिक सूचना जारी गर्न आनाकानी गर्नुका साथै ढिलाइ पनि गरिरहेको छ । स्रोतका अनुसार बारा प्रहरीले आइतबार बिहान चितवनको नारायणघाटबाट वीरगञ्जतर्फ आइरहेको ना ५ ख ६५४४ नम्बरको बसबाट विशेष सूचनाका आधारमा एक जना भारतीयसहित अन्य दुई जनालाई स्रोत नखुलेको १३ लाख रुपैयाँ भन्दा बढी रकमसहित नियन्त्रणमा लिएको थियो ।
पक्राउ परेकाहरूबाट १० लाख १७ हजार ५०० नेपाली रुपैयाँ र १ लाख ४७ हजार ५०० भारतीय रुपैयाँ बरामद गरिएको स्रोतको दाबी छ । पक्राउ परेका भारतीय नागरिकको ५० वर्षीय उजिर मियाँको रूपमा पहिचान खुलेको छ । तर अन्य दुई व्यक्तिको परिचय अझै सार्वजनिक गरिएको छैन । प्रहरीले किन सूचना लुकाउँदै छ? घटनाको गम्भीरता हेर्दा प्रहरीले तुरुन्तै आधिकारिक जानकारी दिनुपर्ने भए पनि अहिलेसम्म कुनै प्रेस विज्ञप्ति जारी गरिएको छैन । प्रहरी प्रशासनले किन यो विषयमा मौनता साधेको हो भन्ने प्रश्न उठ्न थालेको छ ।
बाराका प्रहरी प्रवक्ता, प्रहरी नायब उपरीक्षक (डिएसपी) प्रकाश सापकोटालाई आइतबार नै यस विषयमा फोन मार्फत सम्पर्क गरेर बुझ्दा उनले प्रेस विज्ञप्ति मार्फत जानकारी गराइने बताए । तर, अपराधीहरू पक्राउ परेको झन्डै एक दिन बितिसक्दा पनि प्रहरीले कुनै औपचारिक सूचना सार्वजनिक गरेको छैन । प्रेस विज्ञप्ति सार्वजनिक गर्न किन ढिलाइ? यसबिच, बारा प्रहरीले अवैध घरेलु मदिरा नष्ट गरिएको विषयमा प्रेस विज्ञप्ति जारी गरेको छ । यति मात्र होइन, साना-साना बरामद घटनाहरूमा समेत तुरुन्तै प्रेस विज्ञप्ति दिने बाराको प्रहरी प्रशासनले स्रोत नखुलेको ठूलो रकम फेला परेको घटनामा चुप्पी साध्नु गम्भीर प्रश्न उठ्ने विषय भएको छ ।
अपराधीलाई जोगाउन सूचना लुकाइएको आशङ्का सञ्चारकर्मीहरूको वृत्तमा प्रहरी प्रशासनले अपराधीहरूलाई जोगाउन सूचना लुकाउने प्रयास गरेको हुन सक्ने चर्चा हुन थालेको छ । पक्राउ परेकाहरूको पहिचान सार्वजनिक नगर्नु, प्रेस विज्ञप्ति जारी नगर्नु, र घटनालाई दबाउने प्रयास गर्नुले प्रहरी प्रशासनकै संलग्नतासम्बन्धी शङ्का पैदा गराएको छ । अब प्रहरी प्रशासनले यस घटनामा पारदर्शिता अपनाउनेछ कि लुकाउने रणनीति नै अख्तियार गर्नेछ भन्ने हेर्न बाँकी छ । यदि प्रहरी निष्पक्ष हो भने, उसले तत्कालै पक्राउ परेकाहरूको पहिचान सार्वजनिक गर्नुका साथै घटनाबारे स्पष्ट जानकारी दिनुपर्ने हुन्छ । यात्रा डेलीलाई
