रोयल एकेडेमीको नवौं वार्षिकोत्सव : बालबालिकाद्वारा मानवता र संस्कृतिमा समर्पित प्रस्तुति
-
संजय कुशवहा
- today२७ माघ २०८१
वीरगञ्ज । ‘द सेकेण्ड होम अफ युअर चाइल्ड’ नाराका साथ सञ्चालन भइरहेको रोयल एकेडेमी विद्यालयले शनिबार आफ्नो ९औं वार्षिकोत्सव भव्य रूपमा मनाएको छ । विद्यालयले विशेष कार्यक्रम आयोजना गर्दै सानै उमेरदेखि नै बालबालिकामा मानवताको भावना विकास गराउने उद्देश्य सहित विविध सांस्कृतिक तथा शैक्षिक प्रस्तुति दिएका छन् ।
वीरगञ्जको क्लासिक बैंक्वेटमा आयोजित कार्यक्रममा बाल कक्षा (पीजी)देखि युकेजी सम्मका विद्यार्थीहरूले “मानवताको सुरुवात आफैंबाट” भन्ने विषयवस्तुमा आधारित नाटक प्रस्तुत गरे । साथै, जातीय पहिचान झल्किने परम्परागत भेषभूषामा सुसज्जित विद्यार्थीहरूले सांस्कृतिक नृत्य प्रदर्शन गरेका थिए । विद्यालयकी प्रधानाध्यापक बिजया ओझैयाले मानवता सिक्ने पहिलो थलो परिवार भए पनि विद्यालयले पनि त्यसमा महत्वपूर्ण भूमिका खेल्ने बताइन् । उनले भनिन्, “सानै उमेरदेखि नै विद्यार्थीलाई मानवता, नैतिकता र सामाजिक उत्तरदायित्वबारे सचेत गराउनु आवश्यक छ । यसले उनीहरूलाई भविष्यमा समाजप्रति जिम्मेवार नागरिकका रूपमा स्थापित गर्न मद्दत गर्छ ।”
विद्यालयकी प्रबन्ध निर्देशक सबनम श्रेष्ठले बालबालिकाको चौतर्फी विकासमा विद्यालयले निरन्तर योगदान दिँदै आएको बताइन् । उनले भनिन्, “केवल किताबी ज्ञान मात्र पर्याप्त छैन । अतिरिक्त क्रियाकलापमा अब्बल बनाउँदा बालबालिकाको आत्मविश्वास अभिवृद्धि हुने र उनीहरू आत्मनिर्भर बन्न सक्छन् ।” एकेडेमीका अध्यक्ष ओम श्रेष्ठले बालबालिकालाई केवल किताबी अध्ययनमा सीमित नराखी व्यवहारिक ज्ञानमा पनि केन्द्रित गराउनु पर्ने धारणा व्यक्त गरे । उनले हालैको प्रविधि विकास उल्लेख गर्दै भने, “च्याटजीपीटी, एआई जस्ता प्रविधिहरू द्रुतगतिमा अघि बढिरहेको समयमा केवल सैद्धान्तिक ज्ञान मात्र होइन, अनुभव र व्यवहारिक ज्ञानलाई जोड दिनु आजको आवश्यकता हो ।”
कार्यक्रममा मानव सेवा आश्रमका केन्द्रीय सदस्य देवेश गुप्ता, सञ्चारकर्मी सूर्यनारायण विक, पत्रकार विमला गुप्ता, आनन्द पटेल, ग्लोबल कलेजका सहायक प्रधानाध्यापक सुमन श्रेष्ठ लगायतको उपस्थिति रहेको थियो ।
साथै, अभिभावक, विद्यालयका शिक्षक–शिक्षिका तथा विद्यार्थीहरू कार्यक्रमप्रति अत्यन्त उत्साहित देखिन्थे । कार्यक्रममा भएको नौलो प्रयोग थियो, हरेक पटक उद्घोषको फेरबदल । कक्षा २ देखि ५ सम्मका २४ जना विद्यार्थीहरुले आलोपालो गरेर कार्यक्रमको सहजीकरण गरेका थिए । जसले कार्यक्रममा सुनमा सुगन्ध थपेको थियो ।
