वीरगञ्ज । मधेस प्रदेशभरका महिला स्रष्टाहरूको सहभागितामा प्रज्ञा–नारी काव्य सङ्गोष्ठी २०८१ शनिवार वीरगञ्जमा सम्पन्न भएको छ ।
भोजपुरी प्रतिष्ठान (वीरगञ्ज महानगरपालिका) र नेपाल प्रज्ञा–प्रतिष्ठान साहित्य (काव्य/पद्य) विभागको सहकार्यमा आयोजित कार्यक्रम त्रिजुद्ध माविमा सम्पन्न भएको हो ।
भोजपुरी प्रतिष्ठानकी अध्यक्ष अनिता साहको अध्यक्षतामा सम्पन्न भएको सङ्गोष्ठीको उद्घाटन प्रज्ञा प्रतिष्ठान (काव्य/पद्य) विभाग प्रमुख बाबा बस्नेतले माता सरस्वतीको तस्बिरमा अबिर अर्पण गर्दै गरेकी थिइन् ।
मधेस प्रदेशका विभिन्न जिल्लाबाट आएकी प्रतिभावान् कवयित्रीहरूले आफ्नो उत्कृष्ट काव्य वाचन प्रस्तुत गरेका थिए ।
सर्लाहीबाट सुमित्रा आचार्य, महोत्तरीबाट मञ्जु मञ्जुभाषिणी, सप्तरीबाट मिन्टु पटेल र रञ्जना झा, धनुषाबाट पुनम झा “मैथिली”, रौतहटबाट रेणुका जिसी, बाराबाट रिता चौधरी, सीता अधिकारी, राज श्री, पर्साबाट अनु कुमारी मेहता, मञ्जु कुमारी कोइराला, सीता शर्मा पन्थी, अस्मिता पटेल, उर्मिला गिरी, र सानिया हाडालगायत कवयित्रीहरूले मन छुने कविता सुनाएका थिए ।
कार्यक्रममा वक्ताहरूले महिलाहरू केवल घरको भान्सा र गृहस्थीमै सीमित रहनुपर्ने धारणा तोड्ने कार्य सफलतापूर्वक भएको बताए । भाषा आयोगका सदस्य तथा भोजपुरी प्रतिष्ठानका सल्लाहकार गोपाल अश्कले कार्यक्रम मधेस प्रदेशमा महिला मात्र सहभागी भएको सम्भवतः पहिलो काव्य सङ्गोष्ठी रहेको बताए ।
महिलाहरूको साहित्यिक स्थिति र योगदानबारे गीता भण्डारीले कार्यपत्र प्रस्तुत गरिन्, जसको टिप्पणी शोभा कुमारी पटेलले गरिन् ।
कार्यक्रममा प्रज्ञा प्रतिष्ठान महाशाखा प्रमुख सन्ध्या पहाडी, प्रमोद पाण्डे, वरिष्ठ साहित्यकार मुकुन्द आचार्य, भोजपुरी प्रतिष्ठान बाराका अध्यक्ष रामप्रसाद साह, र विभिन्न क्षेत्रका साहित्य प्रेमीहरूको उल्लेखनीय सहभागिता रहेको मुकेश महतोले जानकारी दिए ।
कार्यक्रमको स्वागत मन्तव्य प्रतिष्ठानका कार्यसमिति सदस्य अमोद गुप्ताले गरेका थिए भने सहजीकरण माधुरी महतोले गरेकी थिइन् ।
काव्य सङ्गोष्ठीले मधेस प्रदेशको साहित्य क्षेत्रमा महिलाहरूको सशक्त उपस्थिति र योगदानलाई उजागर गर्न महत्त्वपूर्ण भूमिका खेलेको देखिन्छ ।
