खानेपानीमन्त्री प्रदीप यादवको कार्यकक्षमा अकस्मात आगलागी, विद्युत सर्टको आशंका
-
अशोक यादब
- today२६ माघ २०८१
काठमाडौँ । खानेपानी मन्त्रालयमा शनिबार बिहान लागेको आगो नियन्त्रणमा आएको छ। खानेपानीमन्त्री प्रदीप यादवको कार्यकक्षमा अकस्मात आगलागी भएपछि सुरक्षाकर्मी र दमकलको सहयोगमा आगो नियन्त्रणमा लिइएको हो।आगलागीका कारण मन्त्रालयमा रहेका दुई वटा टेलिभिजन, एउटा कम्प्युटर, डेस्कटप, पानी तताउने मेसिन, टेबुल, सोफा, कुर्सी र कार्पेटमा क्षति पुगेको छ। यद्यपि, अति आवश्यक कागजातमा कुनै क्षति नभएको मन्त्री यादवले जानकारी दिनुभयो।मन्त्री यादवले सञ्चारकर्मीहरूसँग कुरा गर्दै आगलागीको सम्भावित कारण विद्युत सर्ट हुन सक्ने आशंका व्यक्त गर्नुभयो। "शुक्रबार नै कार्यालयमा विद्युतको तार पोलिएको गन्ध आएको थियो, तर पानी तताउने मेसिनको कारण हो भन्ने सोचेर बेवास्ता गरियो," उहाँले बताउनुभयो।
उर्जा, जलस्रोत तथा सिँचाइ मन्त्री दीपक खड्काले पनि आगलागीको सम्भावित कारण विद्युत सर्ट भएको हुनसक्ने उल्लेख गर्दै अनुसन्धान जारी रहेको जानकारी दिनुभयो। "ठूलो क्षति हुनबाट बचिएको छ। अब मन्त्रालयको सम्पूर्ण विद्युत वायरिङको जाँच गरिनेछ," मन्त्री खड्काले बताउनुभयो।
प्रहरीले घटनाबारे थप अनुसन्धान गरिरहेको छ। आगलागीको वास्तविक कारण पत्ता लगाउन प्राविधिक टोलीले मन्त्रालयको विद्युत प्रणालीको जाँच गर्ने तयारी गरेको छ।मन्त्रालयले सुरक्षा मापदण्डलाई अझ कडाइका साथ पालना गर्दै भविष्यमा यस्ता घटना नदोहोरिनेतर्फ ध्यान दिने प्रतिबद्धता जनाएको छ।
