कुराइस कर बनाउने बहानामा ‘हनी ट्र्याप’, १० लाख ठग्न खोजेकी युवती पक्राउ
-
दिलखुस देवान
- today२४ माघ २०८१
वीरगञ्ज । ‘हनी ट्र्याप’ मार्फत आपराधिक लाभ उठाएको आरोपमा प्रहरीले एक युवतीलाई पक्राउ गरेको छ । चितवनको रत्ननगर नगरपालिका–८ स्थायी घर भई हाल काठमाडौँ–१३ कुलेश्वर बस्दै आएकी २८ वर्षीय अस्मिता आचार्य पक्राउ परेकी हुन् । काठमाडौँ उपत्यका अपराध अनुसन्धान कार्यालयको टोलीले मङ्गलवार अपराह्न कुलेश्वरमै उनलाई नियन्त्रणमा लिएको हो ।
कार्यालयका प्रवक्ता प्रहरी उपरीक्षक काजीकुमार आचार्यका अनुसार अस्मिताले इलेक्ट्रोनिक्स उपकरण मर्मत गर्ने एक व्यक्तिलाई योजनाबद्ध रूपमा ‘हनी ट्र्याप’ मा पारेर ठूलो रकम असुलेकी थिइन् । राइस कुकर बनाउने बहाना, लाखौँ असुली प्रहरी अनुसन्धानअनुसार, आचार्यले पीडितलाई पटक–पटक राइस कुकर मर्मत गर्ने बहानामा आफ्नो कोठामा बोलाइन् । त्यसपछि उनले विभिन्न दबाब र धम्की प्रयोग गरी रकम माग्न थालिन् । रकम दिन अस्वीकार गरे पीडितलाई जबरजस्ती करणीको झुटो मुद्दामा फसाउने धम्की दिइएको खुलेको छ ।
अनुसन्धानका क्रममा पीडितबाट १० लाख रुपैयाँ असुल गर्न खोजेको पुष्टि भएको प्रहरीको भनाइ छ । जसमध्ये तीन लाख रुपैयाँ चेकमार्फत दिइएको थियो भने बाँकी सात लाख एक साताभित्र तिर्ने सम्झौतासहित असुल्ने तयारी भइरहेको अवस्थामा प्रहरीलाई खबर पुगेको थियो । प्रहरीको निगरानीमा अस्मिता प्रहरीले सूचनाका आधारमा अनुसन्धान गर्दै जाँदा आचार्य आफ्नै कोठामा रहेको पुष्टि भएपछि उनलाई पक्राउ गरिएको थियो । अहिले उनलाई जिल्ला प्रहरी परिसर, भद्रकालीमा राखेर थप अनुसन्धान अघि बढाइएको छ ।
प्रहरीका अनुसार आचार्यविरुद्ध आपराधिक लाभसम्बन्धी मुद्दा दर्ता गरिएको छ, र उनलाई कानुनी प्रक्रियाअनुसार कारबाही गरिनेछ ।
