काठमाडौँ–तराई/मधेस द्रुतमार्गको प्रगतिबारे प्रधानमन्त्री ओलीलाई ब्रिफिङ
-
अनजित राउत कुर्मि
- today२४ माघ २०८१
वीरगञ्ज । प्रधानमन्त्री केपी शर्मा ओलीले राष्ट्रिय गौरवको आयोजना काठमाडौँ–तराई/मधेस द्रुतमार्गको हालसम्मको प्रगति, विद्यमान समस्या र समाधानका उपायबारे बुधवार ब्रिफिङ लिएका छन्। प्रधानमन्त्री तथा मन्त्रिपरिषद्को कार्यालयमा आयोजित बैठकमा उपप्रधानमन्त्री तथा अर्थमन्त्री विष्णुप्रसाद पौडेल, भौतिक यातायात तथा पूर्वाधारमन्त्री देवेन्द्र दाहाल, रक्षामन्त्री मानवीर राई, प्रधानमन्त्रीका आर्थिक मामिला सल्लाहकार डा. युवराज खतिवडा, नेपाली सेनाका प्रधानसेनापति अशोकराज सिग्देल तथा उच्चाधिकारीहरूको सहभागिता रहेको थियो।
बैठकमा नेपाली सेनाका प्रतिनिधिले आयोजनाको सुरुवात विन्दू खोकनामा लामो समयदेखि रहेको जग्गा अधिग्रहणको समस्या, आयोजनामा पर्ने रुख कटानमा ढिलाइजस्ता बाधाहरूबारे जानकारी गराए। प्रधानमन्त्री ओलीले नेपाली सेनालाई आयोजना जिम्मा दिँदा सोच विचार गरेर निर्णय गरिएको भन्दै गुणस्तरीय काम हुने विश्वास व्यक्त गरे। साथै, खोकना क्षेत्रमा देखिएका समस्याबारे सम्बन्धित मन्त्रालयले थप अध्ययन गरी समाधानको प्रस्ताव ल्याउन निर्देशन दिए।
कुल ७०.९७ किलोमिटर दूरीको यो द्रुतमार्गको लागत रु दुई खर्ब ११ अर्ब ९३ करोड रहेको छ। आयोजनाको निर्माण कार्य विसं २०७४ मा सुरु भएको थियो भने संशोधित समयावधि अनुसार २०८३ चैतसम्म सम्पन्न गर्ने लक्ष्य रहेको छ।नेपाली सेनाको जंगी अड्डाका अनुसार हालसम्म आयोजनाको समष्टिगत भौतिक प्रगति ३७.६ प्रतिशत र वित्तीय प्रगति ३९.७४ प्रतिशत पुगेको छ। प्रधानमन्त्री ओलीले निर्माण कार्यलाई तीव्रता दिन सबै पक्षले समन्वय गरी समस्या समाधान गर्न जोड दिएका छन्।
