बारा : मामाघर आएका तीन वर्षीय बालक एक हप्तादेखि बेपत्ता, परिवार र पूर्व मन्त्रीद्वारा इनाम घोषणा
-
बलिराम श्रीवास्तव
- today२३ माघ २०८१
बारा । बारा जिल्लाको जितपुर सिमरा उपमहानगरपालिका – ७ स्थित मामाघर आएका तीन वर्षीय बालक हन्श चौधरी एक हप्तादेखि बेपत्ता भएका छन् ।रौतहटको दुर्गा भवानी गाउँपालिका-१ निवासी बालक हन्श चौधरी माघ १७ गते मामा रञ्जित जैसवालको घर अगाडि खेल्ने क्रममा बेपत्ता भएको बारा प्रहरीले जनाएको छ । बारा प्रहरीका प्रवक्ता, प्रहरी नायव उपरीक्षक (डिएसपी) प्रकाश सापकोटाका अनुसार, रातो हुडी र निलो पाइन्ट लगाएको अवस्थामा बालक सम्पर्कविहीन भएका हुन् । बालक बेपत्ता भएपछि परिवार र सुरक्षाकर्मीले विभिन्न प्रयास गरे पनि हालसम्म उनको अवस्था अज्ञात नै रहेको छ ।
बालकको अवस्थाबारे जानकारी दिनेलाई परिवारले एक लाख रुपैयाँ इनाम दिने घोषणा गरेको छ । यसैबिच बारा क्षेत्र नम्बर ४ का प्रतिनिधिसभा सदस्य तथा पूर्व मन्त्री कृष्ण कुमार श्रेष्ठ (किसान) ले पनि बालकको खोजीमा मद्दत गर्ने व्यक्तिलाई थप ५१ हजार रुपैयाँ इनाम दिने घोषणा गरेका छन् । पूर्व मन्त्री श्रेष्ठले बारा र पर्साका सुरक्षा निकायका प्रमुखहरूसँग संवाद गरेर खोजी कार्यलाई तीव्र बनाउन निर्देशन दिएका छन् । उनले आफैँ गाडी लिएर बारा र पर्साका शङ्कास्पद स्थानहरूमा पुगेर खोजी कार्यमा संलग्न हुने प्रतिबद्धता जनाएका छन् ।
बालक हराएपछि परिवारजन आक्रोशित र अत्यन्त चिन्तित छन् । बालकका आमा र हजुरआमा समय–समयमा बेहोस हुने अवस्थामा पुगेका छन् । जिल्ला प्रहरी कार्यालय बाराका प्रमुख, प्रहरी उपरीक्षक (एसपी) सन्तोष तामाङले घटनालाई गम्भीर रूपमा लिएको बताएका छन् । हराएका बालकलाई खोज्न विशेष टोली परिचालन गरिएको र सिसिटिभी फुटेजको अध्ययन भइरहेको उनले जानकारी दिए । फुटेजमा बालकलाई एक्लै देखिए पनि हालसम्म थप विवरण प्राप्त हुन नसकेको प्रहरीको भनाइ छ ।
