निजगढमा जफत गरिएको ढुङ्गाको ठेक्का अन्योलमा, टेन्डरमा कुनै कम्पनीको आवेदन नपरेपछि संशय
-
अमन गुप्ता
- today२२ माघ २०८१
निजगढ । बकैया खोलाबाट अवैधरूपमा निकालिएको र निजगढ नगरपालिका वडा नं ४ कछडिया बस्ती आसपासमा थुपारिएको अवस्थामा जफत गरिएको ढुङ्गाको ठेक्का अहिलेसम्म लागेको छैन।नगरपालिकाले विद्युतीय बोलपत्रमार्फत ३० दिने सूचना जारी गरे पनि आइतवार टेन्डर खोल्दा कुनै पनि इच्छुक कम्पनीले ढुङ्गा निकासीका लागि आवेदन नदिएको नगरपालिकाको राजस्व शाखाले जनाएको छ।नगरपालिकाले जफत गरेको ६७,७३२.८९ घनमिटर (२३,८९,६१६.७० क्यूफिट) ढुङ्गाका लागि मूल्य अभिवृद्धि करसहित २ करोड १६ लाख २ हजार १३६ रुपैयाँको टेन्डर आह्वान गरेको थियो।
तर, कुनै पनि ठेकेदार वा कम्पनीले टेन्डर नहालेपछि जफत गरिएको ढुङ्गाको व्यवस्थापन अन्योलमा परेको छ।स्थानीय स्रोतका अनुसार, अवैधरूपमा उत्खनन गरिएका यी ढुङ्गालाई कानूनी प्रक्रियाविनै वैध बनाउँदै ठेकेदारमार्फत निकासी गर्ने प्रयास भइरहेको थियो। विवाद उत्पन्न भएपछि नगरपालिकाले ढुङ्गा जफत गरी टेन्डर आह्वान गर्न बाध्य भएको हो।नगरप्रमुख सुरथ पुरी र प्रमुख प्रशासकीय अधिकृत अजय बर्तौला माथि ठेकेदार कम्पनी जय गणेश सप्लायर्स सँग मिलेमतो गरी अवैध निकासीको प्रयास गरेको आरोप लागेको छ।
सूत्रका अनुसार, जफत गरिएको ढुङ्गामध्ये १२ हजार घनमिटर (१,००० भन्दा बढी टिपर) ढुङ्गा निजगढ नगरपालिका र स्थानीय प्रहरी प्रशासनको संरक्षणमा घाटगड्डी हुँदै अवैधरूपमा निकासी गरिएको छ।नगरपालिकाको ठेक्का प्रक्रियामा कसैले रुचि नदेखाउनुको कारण पहिले नै ठूलो परिमाणमा ढुङ्गा तस्करी भइसकेको हुन सक्ने आशङ्का गरिएको छ। यस विषयमा नगरपालिकाले आगामी रणनीति के अपनाउनेछ भन्ने विषयमा अझै अन्योल कायम रहेको छ।
