पर्सा प्रहरीद्वारा भन्सार छली गरी ल्याइएका ३ लाख ७० हजार बराबरका खाद्यान्न र कपडा बरामद
-
अशोक यादब
- today२१ माघ २०८१
वीरगञ्ज । पर्सा प्रहरीले भन्सार छली गरी चोरी पैठारी गरिएका विभिन्न प्रकारका लत्ताकपडा तथा खाद्यान्न बरामद गरेको छ ।
विशेष सूचनाका आधारमा सञ्चालन गरिएको प्रहरी अभियानबाट करिब ३ लाख ७० हजार ९९० रुपैयाँ बराबरको अवैध सामान नियन्त्रणमा लिइएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डिएसपी) किशोर लम्सालका अनुसार, माघ १९ गते प्रहरीको संयुक्त टोलीले पर्साका विभिन्न स्थानमा अपरेसन सञ्चालन गर्दै भन्सार छली गरी ल्याइएका सामानहरू बरामद गरेको हो । बरामद परेका सामानमा मुख्यतः लत्ताकपडा तथा खाद्यान्न रहेका छन् ।
प्रहरीका अनुसार, अवैध रूपमा भित्र्याइएका सामग्री बिना कुनै कानुनी प्रक्रिया भारतबाट नेपाल ल्याइएका थिए । प्रहरीले यस प्रकारको गैर कानुनी आयात नियन्त्रण गर्न निरन्तर अभियान सञ्चालन गरिरहेको बताएको छ ।
बरामद गरिएका सामानहरू आवश्यक कारबाहीका लागि सम्बन्धित निकायलाई बुझाइएको छ । साथै, प्रहरीको टोलीले सीमावर्ती क्षेत्रहरूमा निगरानी थप कडा पार्ने प्रतिबद्धता व्यक्त गरेको छ ।
घटनाले नेपाल–भारत सीमामा भन्सार छली तथा अवैध आयातको समस्या कायमै रहेको देखाएको छ । स्थानीय बासिन्दाहरूले पनि यस विषयमा कडाइ गर्नुपर्ने माग गर्दै आएका छन् । प्रहरीले यस प्रकारका गतिविधि रोक्न थप निगरानी तथा निगरानी संयन्त्रलाई प्रभावकारी बनाउने योजना बनाएको जनाएको छ ।
