भारतीय अपस्ट्रिम प्रदायक एयरटेलको ब्यान्डविथ आपूर्ति रोकिँदा नेपालभर इन्टरनेट सेवा प्रभावित
-
बलिराम श्रीवास्तव
- today२० माघ २०८१
वीरगञ्ज । नेपालभर इन्टरनेट सेवा आइतबार राति ९ बजेदेखि गम्भीर रूपमा प्रभावित भएको छ । देशभरका मोबाइल तथा इन्टरनेट सेवाप्रदायकका ग्राहकहरूले इन्टरनेट सुस्त भएको वा पूर्ण रूपमा अवरुद्ध भएको गुनासो गरिरहेका छन् ।
हालसम्म समस्याको यकिन कारण खुलेको छैन, तर प्रारम्भिक विवरणअनुसार नेपालमा इन्टरनेट ब्यान्डविथ आपूर्ति गर्ने भारतीय अपस्ट्रिम प्रदायकबाट आपूर्तिमा कमी आएको आशंका गरिएको छ ।
इन्टरनेट सेवा प्रदायक कम्पनीका एक प्राविधिकका अनुसार हाल नेपालमा उपलब्ध कुल ब्यान्डविथमध्ये करिब आधा गुमिसकेको छ, जसले इन्टरनेट सेवामा व्यापक असर पारेको छ ।
इन्टरनेट सेवाप्रदायक संघ नेपाल (आईस्पान) का प्रमुख कार्यकारी अधिकृत (सीईओ) सुवास खड्काका अनुसार भारतीय अपस्ट्रिम प्रदायक एयरटेलको ब्यान्डविथ नेपालमा आउन पूर्ण रूपमा रोकिएको छ । “एयरटेल पूर्ण रूपमा डाउन छ। यो प्राविधिक समस्या हो वा अन्य कुनै कारणले रोकिएको हो, अझै स्पष्ट भइसकेको छैन,” खड्काले भने ।
इन्टरनेट सेवा अवरुद्ध हुँदा नेपालका बैंकिङ सेवा, डिजिटल कारोबार, अनलाइन कारोबार, सामाजिक सञ्जाल, सञ्चार माध्यम, तथा अन्य डिजिटल सेवा प्रभावित भएका छन् । इन्टरनेटमा भर पर्ने व्यवसाय तथा सर्वसाधारण समस्यामा परेका छन् ।
नेपालका इन्टरनेट सेवा प्रदायकहरू समस्याको समाधानका लागि पहल गरिरहेका छन् । भारतीय अपस्ट्रिम प्रदायकहरूसँग सम्पर्क गरी समस्या समाधानका लागि वार्ता भइरहेको छ । इन्टरनेट प्रदायक कम्पनीहरूका अनुसार सेवा कहिले सुचारु हुन्छ भन्ने यकिन जानकारी प्राप्त भइसकेको छैन, तर प्राविधिक टोलीहरू समस्या समाधानका लागि सक्रिय छन् ।
इन्टरनेट सेवा प्रभावित हुँदा डिजिटल युगमा यसको गम्भीर असर देखिएको छ । उपभोक्ताहरू समस्या समाधानका लागि सम्बन्धित निकायहरूले तत्काल पहल गर्ने आशा गरिरहेका छन् ।
