शाखा अधिकृत धनेश्वर प्रसाईंसहित ३ जनाविरुद्ध भ्रष्टाचार मुद्दा दायर
-
अनजित राउत कुर्मि
- today२० माघ २०८१
वीरगञ्ज । अख्तियार दुरुपयोग अनुसन्धान आयोगले राष्ट्रिय किताबखाना (शिक्षक) छाउनी, काठमाडौंका शाखा अधिकृत धनेश्वर प्रसाईंसहित ३ जनाविरुद्ध भ्रष्टाचार मुद्दा दायर गरेको छ ।
३ लाख रुपैयाँ घुस लिइसकेको अवस्थामा पक्राउ परेका उनीहरूविरुद्ध आइतबार विशेष अदालत काठमाडौंमा मुद्दा दायर गरिएको आयोगले जनाएको छ।
आयोगका प्रवक्ता नरहरि घिमिरेका अनुसार प्रसाईंले पेन्सनपट्टा बनाई दिने प्रयोजनका लागि सेवाग्राहीसँग घुस लिएका हुन् । आयोगको टङ्गालबाट खटिएको टोलीले प्रसाईंलाई सेवाग्राहीबाट लिएको ३ लाख रुपैयाँसहित नियन्त्रणमा लिएको थियो ।
अनुसन्धानका सिलसिलामा राष्ट्रिय किताबखाना (शिक्षक) छाउनी, काठमाडौंका शाखा अधिकृत प्रसाई, कार्यालय सहयोगी भवानी अधिकारी र बिचौलिया सुदर्शन न्यौपानेसमेतको मिलोमतोमा सेवाग्राहीको नियमानुसार पेन्सन पट्टा (निवृत्तभरण अधिकार पत्र) बनाइदिनका लागि विभिन्न बहानामा घुस मागेको खुलेको थियो ।
आयोगले उनीहरूलाई कैद र बिगो बमोजिम जरिवानाको सजाय मागदाबी गरेको छ ।
