महोत्तरीमा १९ वर्षीय महिलाको धारिलो हतियार प्रहार गरी बीभत्स हत्या, शव खेतमा फेला
-
अनजित राउत कुर्मि
- today२० माघ २०८१
महोत्तरी । महोत्तरीको गौशाला नगरपालिका–८ निवासी १९ वर्षीय खुश्बु यादवको धारिलो हतियार प्रहार गरी बीभत्स हत्या गरिएको छ । मृतक खुश्बु स्थानीय अभिषेक यादवकी श्रीमती हुन् ।
खुश्बु राति घरबाट निस्किएपछि बेपत्ता भएकी थिइन् । खोजीका क्रममा आज बिहान गौशाला नगरपालिका–५ स्थित विद्युत् प्राधिकरण कार्यालयबाट करिब पाँच मिटर उत्तरको खेतमा उनको शव फेला परेको प्रहरीले जनाएको छ ।
प्रारम्भिक अनुसन्धानका आधारमा उनलाई धारिलो हतियार प्रयोग गरी हत्या गरिएको अनुमान गरिएको छ ।
घटनाबारे थप अनुसन्धान भइरहेको जिल्ला प्रहरी कार्यालय महोत्तरीका प्रवक्ता, प्रहरी नायव उपरीक्षक (डिएसपी) सन्तुलाल जैसवारले जानकारी दिए ।
घटनास्थलमा प्रहरीको टोली पुगेर अनुसन्धान गरिरहेको छ। हत्या कसरी, किन, र कसले गर्यो भन्नेबारे थप विवरण आउन बाँकी छ ।
घटनाले स्थानीयवासीमा त्रास फैलिएको छ । सुरक्षित रूपमा घरबाहिर निस्कन समेत डर लाग्ने अवस्था आएको भन्दै स्थानीयले छिटो अपराधी पत्ता लगाएर कारबाही गर्न माग गरेका छन् ।
प्रहरीले घटनाको गहिरो अनुसन्धान गरी दोषी पत्ता लगाउने र कानुनी कारबाही अघि बढाउने प्रतिबद्धता जनाएको छ ।
