ठाकुरराम बहुमुखी क्याम्पसमा ‘स्ववियु निर्वाचन र विद्यार्थीका अपेक्षा’ विषयमा छलफल
-
बिशाल यादब
- today१८ माघ २०८१
वीरगञ्ज । वीरगञ्जस्थित ठाकुरराम बहुमुखी क्याम्पसमा स्ववियु निर्वाचन र विद्यार्थीको अपेक्षा विषयमा छलफल भएको छ । स्ववियु निर्वाचन नजिकिदै गरेको हुँदा विद्यार्थीका अपेक्षा बुझ्ने अभिप्रायले नेपाल विद्यार्थी संघ ठाकुरराम बहुमुखी क्याम्पसका नेता बिकास मण्डलको आयोजनामा छलफल गरिएको हो ।
पछिल्लो १५ वर्षदेखि निर्वाचन हुन नसकेको ठाकुरराम बहुमुखी क्याम्पसमा यस पटक जसरी पनि निर्वाचन गराउने वातावरणको सृजना गर्नुपर्नेमा छलफलमा सहभागीहरुले जोड दिएका थिए । त्रिभुवन विश्वविद्यालय भन्दा पनि ८ वर्ष पुरानो क्याम्पस ठाकुरराम बहुमुखी क्याम्पसमा पछिल्लो १५ वर्षदेखि निर्वाचन हुन सकेको छैन । त्रिभुवन विश्वविद्यालयका आंगिक क्याम्पसहरुमा आगामी चैत ५ गते निर्वाचन हुने तालिका सार्बजनिक भइसकेको छ ।
नेविसंघ पर्साका पूर्व अध्यक्ष दिलिपराज कार्कीले विद्यार्थी नेताहरु जसरी पनि चुनाव हुने अवस्था निर्माण लाग्न सुझाव दिए । चुनावको कुरामा एकमत भएर सहमती र सहकार्य गरेर अघि बढ्न उनले आग्रह गरे ।
नियमित पठन पाठन हुनुपर्ने, पुस्तकालयमा पुस्तक सहज र अत्याधिक मात्रा उपलब्ध हुनु पर्ने, छात्रछात्राको छुट्टाछुट्टै व्यवस्थित शौचालय निर्माण हुनुपर्ने, भएका शौचालयको नियमित सरसफाई हुनुपर्ने, शैक्षिक वातावरण राम्रो हुनुपर्ने लागयतका अपेक्षा छलफलमा सहभागी विद्यार्थीहरुले राखेका थिए ।
नेविसंघ पर्साका अध्यक्ष रमेश यादवले आउने निर्वाचनमा नेविसंघलाई अत्यधिक मत दिएर विजय गराउन आग्रह गरे ।
नेपाली कांग्रेस वीरगञ्ज महानगर सभापति मणिन्द्रलाल नेपालीले यस निर्वाचनलाई सफल गराउन सबै लाग्नुपर्ने र निर्वाचन भए मात्र विद्यार्थीको अपेक्षा र मागहरु सम्बोधन आश्वासन दिए ।
छलफलमा नेपाली कांग्रेस जिल्ला सदस्य रामनिवस यादव, तरुण दलका केन्द्रिय सदस्य रोशन सिंह, नेविसंघ केन्द्रिय सदस्य सुरेन्द्र लामिछाने, नेता बाबुनन्द कुर्मी, पुरुसोत्तम कुर्मी लगायतले निर्वाचन गराउनुपर्नेमा जोड दिएका थिए । निर्वाचनबाटै नेतृत्व चयन हुने र नेतृत्वबाटै नीति र नियममा क्याम्पस सञ्चालन हुने उनीहरुको धारणा थियो ।
नेविसंघकाका नेता बिकास मण्डलले छलफलमा उठेका विषयलाई नै मुख्य एजेण्डा बनाएर निर्वाचनमा होमिने बताए । कार्यक्रममा नेविसंघ ठाकुर राम क्याम्पसका जय नेपाल चौरसिया, लगायत सयौं विद्यार्थीको उपस्थिति रहेको थियो । कार्यक्रमको सन्चालन अजयेन्द्र मण्डलले गरेका थिए ।
छलफलमा बिबिएस, बिएड, बिआइटी, बिबिएस र बिएससीका छात्र छात्राहरुको उपस्थिती रहेको थियो ।
