सरकारले ल्याएको अध्यादेश अस्वीकार गर्ने विपक्षी दलको निर्णय
-
मो.सगिर अलि
- today१७ माघ २०८१
वीरगञ्ज । सरकारले ल्याएको अध्यादेश सांसदका विपक्षी दलले अस्वीकार गर्ने निर्णय गरेका छन् ।
बिहीबार (आज बिहान) नेकपा माओवादी केन्द्रको संसदीय दलको कार्यालय सिंहदरबारमा बसेको विपक्षी दलको बैठकले अध्यादेश अस्वीकार गर्ने निर्णय गरेको हो ।
आजको बैठकमा शुक्रवारदेखि सुरु हुने संसद्को हिउँदे अधिवेशनमा कसरी प्रस्तुत हुने भन्ने विषयमा छलफल भएको माओवादी केन्द्र संसदीय दलका प्रमुख सचेतक हितराज पाण्डेले बताए । उनले बैठकमा सरकारले अध्यादेश गलत तरिकाले ल्याएको विषयमा छलफल भएको बताए ।
प्रमुख सचेतक पाण्डेले भने, ‘सरकारले सदन बोलाउने बेलामै जसरी अध्यादेश ल्याएको छ, प्रक्रियाका हिसाबले पनि गलत छ र संसद्को अर्थ समितिमै छलफल भएको विधेयकलाई पनि मिनिमाइज गरेर अध्यादेश ल्याएको छ । यसमा सबै विपक्षी दलहरूले गलत भयो भन्ने निष्कर्ष निकालियो । र, अस्वीकार गर्ने निर्णय भयो ।’
बैठकमा माओवादी केन्द्रका अध्यक्ष पुष्पकमल दाहाल ‘प्रचण्ड’, राष्ट्रिय स्वतन्त्र पार्टीका कार्यवाहक सभापति डिपी अर्याल, एकीकृत समाजवादीका अध्यक्ष माधवकुमार नेपाल, राप्नपा नेता ध्रुवबहादुर प्रधान, नेपाल समाजवादी पार्टीका अध्यक्ष महिन्द्र यादव, जनमोर्चाका अध्यक्ष चित्रबहादुर केसी लगायत नेताहरूको सहभागिता थियो ।
