वीरगञ्ज । सरस्वती पूजा नजिकिएसँगै मूर्तिकारहरू मूर्ति निर्माणमा व्यस्त भएका छन्। वीरगञ्जको लाल बंगाल क्षेत्रमा मूर्ति बनाउने काममा लागेका मूर्तिकारहरूले यस वर्ष अघिल्लो वर्षको तुलनामा मूर्ति बिक्रीमा कमी भएको मूर्तिकार पोखरिया नगरपालिका पर्साका छोटेलाल बैठाले गुनासो गरेका छन्।
लाल बंगालका मूर्तिकारहरू हाल दिनरात नभनी सरस्वती देवीका मूर्तिहरू तयार गर्न व्यस्त छन्। तर, अघिल्लो वर्षको तुलनामा यस पटक ग्राहकको चहलपहल कम देखिएको उनीहरूको भनाइ छ। अघिल्लो वर्ष यो समयमा सबै मूर्ति बुक भइसक्थ्यो, तर यस पटक बिक्रीमा कमी छ मूर्तिकार बैठाले दुखेसो व्यक्त गरे।
मूर्ति बनाउने सामग्रीको मूल्य वृद्धि, आर्थिक चुनौती, र व्यक्तिगत पूजामा देखिएको कमीका कारण मूर्तिहरूको माग घटेको हुनसक्ने अनुमान मूर्तिकारहरूले गरेका छन्।यद्यपि, मूर्तिकारहरू आफ्नो कला र मेहनतमार्फत बजारमा आकर्षण बढाउने प्रयासमा जुटेकाछन् । विभिन्न प्रकारका मूर्ति, साना र ठूला, सबै प्रकारका ग्राहकहरूको आवश्यकता पूरा गर्नका लागि तयार गरिरहेका छन्।
सरस्वती पूजाको नजिक आइरहेको समयमा मूर्तिकारहरूको परिश्रम र मेहनतले वीरगञ्जमा चाडपर्वको उत्साह थपिने अपेक्षा गरिएको छ।
